Քաղաքականություն
20.09.2021 | 21:4644-օրյա պատերազմից հետո Հայաստանի և Թուրքիայի իշխանություններն ամենաբարձ մակարդակով սկսել են ավելի հաճախակի խոսել հայ-թուրքական հարաբերություններում առկա խնդիրների կարգավորման մասին: Երեկ Թուրիքայի նախագահ Ռեջեփ Թայիփ Էրդողանը հայտարարել է, որ Նիկոլ Փաշինյանը Վրաստանի վարչապետ միջոցով իրեն հանդիպման առաջարկ է արել: Էրդողանը իր խոսքում անդրադարձել է ադրբեջանական կողմից շրջանառության մեջ դրված «զանգեզուրյան միջանցք» գաղափարին և շեշտել՝ հայկական կողմը պետք է հստակ քայլեր ձեռնարկի:
Էրդողանի հայտարարությունից մեկ օր անց պաշտոնական Երևանը չի հերքել, որ Վրաստանի վարչապետի միջոցով Թուրքիայի նախագահին հանդիպման առաջարկ է արվել: Հայաստանի վարչապետի խոսնակը հայտարարել է՝ Հայաստանի կառավարությունը պատրաստ է Թուրքիայի հետ բարձր մակարդակի երկխոսություն սկսել, եթե արդյունավետ շփումներ սկսվեն Երևանի և Անկարայի միջև:
Երևանը, թեև ցանկություն ունի Անկարայի հետ շփումներ սկսել, սակայն Մանե Գևորգյանի պատասխանից պարզ է դառնում, որ Հայաստանը մերժում է Էրդողանի՝ «Զանգեզուրի միջանցքի» հետ կապված ցանկությունները:
Հայաստանի հետ հարաբերությունները կարգավորելու հարցում Թուրքիան որևէ կառուցողական քայլ չի կատարում, կարծում է թուրքագետ Ռուբեն Սաֆրաստյանը:
«Էրդողանն իր այս հայտարարություններով պարզապես ցանկանում է աշխարհին ցույց տալ, որ խաղաղասեր է»,- նշում է թուրքագետը և շեշտում՝ Թուրքիան Հայաստանի հետ տնտեսական կապերի ամրապնդման անհրաժեշտություն չունի: Ըստ Սաֆրաստյանի՝ թուրքական կողմը, այսպես կոչված, «Զանգեզուրի միջանցքի» հետ կապված հատուկ պլաններ ունի:
Քաղաքագետ Սարո Սարոյանն էլ նշում է, որ Էրդողանի հայտարարության ենթատեքստում ռուս-թուրքական շահերը սպասարկող ցանկություններն են:
Հայաստանի ղեկավարությունը Թուրքիայի հետ հարաբերությունների զարգացման մասին ակնարկել էր դեռ այս տարվա մարտին: Նիկոլ Փաշինյանը հայաստանցիներին հորդորել էր փոխել վերաբերմունքն այդ պետության նկատմամբ:
Արդեն սեպտեմբերի 8-ին Փաշինյանը հայտարարել էր, որ պաշտոնական Երևանը Հայաստան-Թուրքիա հարաբերությունները կարգավորելու, հայ-թուրքական երկաթուղին և ճանապարհները վերագործարկելու մասին խոսելու հնարավորություն է տեսնում։
Ստամբուլում հրապարակվող «Ակոս» թերթի խմբագիր Բագրատ Էստուկյանն էլ կարծում է, որ Հայաստանը չպետք է հայ-թուրքական հարաբերությունների կարգավորման նախաձեռնողը լինի։
Նարեկ Կիրակոսյան
