Քաղաքականություն
20.09.2021 | 22:32
Ադրբեջանի էներգետիկայի նախարար Փարվիզ Շահբազովը ռուսական ամսագրին տված հարցազրույցում ասել է, որ ռուսական ընկերությունները 4․9 մլրդ դոլարի ներդրում են արել Ադրբեջանի նավթագազային ոլորտում։ Գրում են ադրբեջանական լրատվամիջոցները։
«2000-2020 թթ. Ադրբեջանի նավթային ոլորտ 109․5 մլրդ դոլար է ներդրվել, որից 79․5 տոկոսը կազմում են օտարերկրյա ներդրումները։ Ինչ վերաբերում է ռուսական կապիտալ ներդրումներին, պետք է նշել, որ մեր երկրների միջև քաղաքական ու տնտեսական հարաբերություններն անշեղորեն զարգանում են ու այսօր հասել են ռազմակավարական գործընկերության»,- ասել է նախարարը՝ նշելով, որ Ադրբեջանի ու Ռուսաստանի միջև փոխադարձ ներդրումների լավ դինամիկա է նկատվում։
«Ադրբեջանում այսօր գործում է ավելի քան 1000 ընկերություն ռուսական կապիտալով։ Ռուսական ընկերությունների ընդհանուր ներդրումն Ադրբեջանի նավթագազային ոլորտում 2021-ի ապրիլի 1-ի դրությամբ կազմում է 4․9 մլրդ դոլար»,- ասել է Շահբազովը։
Նա նաև հավելել է, որ ռուսական «Լուկօյլը» առաջին ընկերություններից է, որը սկսել է աշխատել Ադրբեջանի նավթագազային սեկտորում։ Հիմա էլ այն մտադրություն է հայտնել մասնակցել «Դոստլուք» հանքավայրի շահագործմանը, որպես օպերատոր։
Էմմա Չոբանյան
