«Պարգևավճար տալն իմ որոշումն է, ճիշտ որոշում է, ես քննադատություններից չեմ վախենում»․ Ալեն Սիմոնյան. ՏԵՍԱՆՅՈՒԹ

Այսօր Գյումրու տոնին մասնակցող Ալեն Սիմոնյանը, անդրադառնալով Հայաստանի Հանրապետության Անկախության տոնի առթիվ Ազգային ժողովի պատգամավորներին ու, առհասարակ, պետական համակարգում ծառայողներին պարգևավճարներ տալու թեմային, ասաց․ «Դա եղել է իմ որոշումը, Անկախության 30-ամյակին նվիրված պետական համակարգի բոլոր աշխատակիցները ստանալու են այդ վճարը։ Եվ ես որոշում եմ կայացրել, որ Ազգային ժողովի աշխատակազմը, ինչպես նաև պատգամավորները նույնպես պիտի ստանան Հայաստանի Հանրապետության Անկախության տոնի հետ կապված վճարումները։ Եվ ես տեսել եմ, որ մեր ընդդիմադիր ընկերները նախ մի պահ հայտարարեցին, որ իրենք բյուջե են վերադարձնելու, հետո հայտարարեցին, որ իրենք ինչ-որ ծախսեր են անելու։

Ես կարող եմ ասել՝ իրենք որ իրենց մեջ փնտրեն, շատ տարբեր գումարներ կարող են գտնել, որ պետք է բյուջե վերադարձնեին շատ ավելի շուտ, այլ ոչ թե այս մի քանի հարյուր հազար դրամի մասին մտածեին։ Իսկ եթե ինչ-որ բան էին ուզում անել, ես վստահ եմ, իրենց մեջ կկարողանան գտնել շատ գումարներ, օրինակ՝ ինչ-որ սահմանամերձ գյուղում դպրոց վերանորոգելու համար։ Եվ սակարկել հերթական անգամ այդ որոշումը, տեղին չեմ համարում»։

Ալեն Սիմոնյանը նաև նշեց, որ ինքը քննադատություններից չի վախենում, համարում է, որ ճիշտ որոշում է կայացրել։

Հիշեցնենք, որ թեմայի առնչությամբ Factor.am-ը մեկնաբանություն էր ստացել ԱԺ նախագահի խոսնակից։ Հարցին՝ որքա՞ն գումարով են պարգևատրվել պատգամավորները՝ Ծովինար Խաչատրյանն ասել էր. «Պատգամավորներն աշխատավարձի 75 տոկոսի չափով են պարգևատրում ստացել։ Գումարը փոխանցվել է երեկ, այսօր պետք է որ արդեն իրենց հաշվին լինի»։

Արմիկ Մովսիսյան