Քաղաքականություն
16.09.2021 | 21:25Այսօր Դուշանբեում տեղի ունեցած գագաթնաժողովին ՀԱՊԿ-ի նախագահությունը մեկ տարով փոխանցվեց Հայաստանին: Սա ենթադրում է, որ Հավաքական անվտանգության խորհրդի հաջորդ նիստը կանցկացվի Երևանում, ինչպես նաև Կազմակերպության անդամ երկրների Պաշտպանության նախարարների խորհուրդների և Անվտանգության խորհրդի քարտուղարների կոմիտեի նիստերը:
Իսկ ինչ է տալու Հավաքական անվտանգության պայմանագրի կազմակերպության նախագահության ստանձնումը, ըստ քաղաքական փորձագետ Ռուբեն Մեհրաբյանի, այն որևէ առավելություն չի ապահվելու:
ՀԱՊԿ-ը ամիսներ առաջ մերժել էր Երեւանի դիմումը՝ ադրբեջանական զորքերը Հայաստանի սուվերեն տարածքից դուրս բերելու առնչությամբ: Հիշեցնենք՝ կառույցի գլխավոր քարտուղար Ստանիսլավ Զասը ադրբեջանական զինուժի Հայաստան ներխուժումը որակել էր սահմանային միջադեպ և ընդգծել, որ հայկական կողմի դիմումը չի համապատասխանում ՀԱՊԿ հավաքական պաշտպանության կանոնադրության դրույթներին:
Զասը նաև խեղաթյուրելով իրականությունը հուլիսի 3-ի իր հայտարարությունում հայտնել էր, որ զոհեր չկան, սակայն, մայիսի 25-ին Գեղարքունիքի մարզի Վերին Շորժա գյուղի սահմանին պայմանագրային զինծառայող էր զոհվել թշնամու արձակած կրակոցից:
ՀԱՊԿ-ի նախագահությունը ստանձնելուց հետո Նիկոլ Փաշինյանը Դուշանբեում ուշագրավ շեշտադրումներով ելույթ է ունեցել:
«Հավաքական անվտանգության տարբեր շրջաններում իրավիճակի զարգացման տրամաբանությունը հստակ ցույց է տվել ճգնաժամային արձագանքման մեխանիզմների արդիականացման անհրաժեշտությունը: Ակնհայտ է ճգնաժամային իրավիճակների մշտադիտարկման, կանխատեսման և կանխարգելման մեխանիզմների անհրաժեշտությունը: Գործնականում այս ամենը կձևավորվի, այդ թվում՝ Ճգնաժամային արձագանքման կենտրոնի լիարժեք գործունեության ապահովման միջոցով»,- ասել էր նա:
Փաշինյանն իր ելույթում, ըստ էության, ակնարկում է ՀԱՊԿ-ի անգործությունը Ադրբեջանի ագրեսիվ գործողությունների ֆոնին:
Ռուբեն Մեհրաբյանն ասում է՝ Փաշինյանի բարձրաձայնած խնդիրները լուծում չեն ստանա, եթե անդամ պետությունները չցանկանան:
Ուշագրավ է՝ Հայաստանը ստանձնում է տարածաշրջանում անվտանգություն ապահովող կառույցի նախագահությունը, սակայն, օրակարգում ներառված չեն Հայաստանի տարածքային ամբողջականության խախատման վերավերյալ հարցեր: ՀԱՊԿ-ի օրակարգում Աֆղանստանում տիրող իրավիճակն է:
Քաղաքագետ Գարիկ Քեռյանը, մինչդեռ, Հայաստանի կողմից ՀԱՊԿ նախագահության ստանձման մեջ, այուհանդերձ, տեսնում է որոշ դրական տարրեր: Ըստ նրա՝ Ադրբեջանն իրեն ավելի զուսպ և ավելի հավաք է պահելու այս մեկ տարվա ընթացքում:
Նարեկ Կիրակոսյան
