Քաղաքականություն
14.09.2021 | 17:22Իշխանությունն ի զորու կլինի՞ ապահովել մեր երկրի անվտանգությունն ու կայունությունը: Factor.am-ի հետ զրույցում անդրադառնալով այս հարցին և դիտարկմանը, որ ստեղծված անվտանգային խնդիրները իշխանությունը չի կապում իր անկարողությունների հետ և բնորոշում է որպես հակառակորդի կողմից ձեռնարկվող սադրանքներ, «Հայաստան» խմբակցության պատգամավոր Հայկ Մամիջանյանը նշեց. «Ինչ է նշանակում, որ հակառակորդի կողմից կարող են լինել սադրանքներ, բա թշնամի է, պետք է սադրանքներ անի: Շատ զարմանալի չէ, իրենց խմբակցության պատգամավոր Լենա Նազարյանն ասում էր՝ գերիների մասին գնացե՛ք, Ադրբեջանի՛ց հարցրեք: Կարող է ինչ-որ պահ գա, և իրենք ասեն՝ անվտանգության հարցով գնացե՛ք, Ադրբեջանից պահանջեք»:
«Իհարկե այս իշխանությունն ի զորու չէ անվտանգային հարցերը լուծել: Նախորդող երեք տարին և մասնավորապես ցայտուն կերպով նախորդ մեկ տարին բավարար չէ՞ր հասկանալու համար, որ ի զորու չեն»,- նշեց Մամիջանյանը՝ հավելելով, որ խնդրի լուծումը իշխանափոխությունն է:
Դիտարկմանը, որ «Քաղաքացիական պայմանագիր» խմբակցության պատգամավորներից մեկը տեսակետ է հայտնել, որ Գորիս – Կապան ճանապարհի խնդրահարույց հատվածի փոխարեն պետք է արագացնել այլընտրանքային ճանապարհի կառուցումը, որը չի անցնի Ադրբեջանի տարածքով, Մամիջանյանն արձագանքեց. «Եթե իր հայրենի տան վրա թշնամիները հարձակվեն, ի՞նչ է ասելու այդ պատգամավորը, պետք է կառուցել այլ հայրական տուն, որը չի գտնվի թշնամու տարածքո՞ւմ: Չէ՛, մենք մեր հայրենիքի ամեն հատվածը՝ թե՛ Հայաստանը, թե՛ Արցախը պետք է պաշտպանենք, պետք է բարձրաձայնենք մեր հայրենիքի օկուպացված տարածքների մասին»:
Մանրամասները՝ տեսանյութում:
