«Հայաստան» դաշինքը չի մասնակցի այս քվեարկությանը․ ձեր ստեղծած համակարգը հավատ չի ներշնչում. Մինասյան. ՏԵՍԱՆՅՈՒԹ

«Կոռուպցիան ծնող հիմնական շարժառիթն ու պատճառը իշխանական ազդեցության լծակն է»,- այս մասին Ազգային ժողովում հայտարարեց «Հայաստան» խմբակցության քարտուղար Արծվիկ Մինասյանը:

Մինասյանի խոսքով՝ սկզբունքային նշանակություն ունի, թե ինչպես ենք պատկերացնում հակակոռուպցիոն քաղաքականությունը և թե որոնք են կոռոպցիայի դեմ պայքարի հակահամակարգային տարրերը, որոնք պետք է նպաստեն, որ կոռուպցիայի դեմ պայքարը արդյունավետ լինի. «Անշուշտ, ինչպես միջազգային փորձն է վկայում, դրա կենտրոնական տեղում ընդդիմությունն է, որը պետք է կարողանա զսպել, հասնել այն բանին, որ իշխանական լծակների տիրապետող անձինք կարողանան զերծ մնալ կոռուպցիոն դրսևորումներից»:

«Սակայն այն մոդելը, որը որդեգրվել է հիմա, բացարձակ զրոյացրել է ընդդիմության դերակատարությունը: Ընդդիմությունն այստեղ ո՞ւր է, որտե՞ղ է, ինչպե՞ս պետք է կարողանա օբյեկտիվ տեղեկատվություն ստանա պառլամենտը, երբ չկա ընդդիմության խոսքը», – նշեց ընդդիմադիր պատգամավորը:

Նա նաև հավելեց, որ հակակոռուպցիոն քաղաքաքականության կենտրոնական, սկզբունքային հարցերից մեկը ընդդիմության դերակատարությունն է:

Մինասյանը հայտնեց, որ «Հայաստան» խմբակցությունը չի մասնակցի Կոռուպցիայի կանխարգելման հանձնաժողովի անդամի թեկնածուի քվեարկությանը:

Նշենք՝ Ազգային ժողովը քննարկում է Կոռուպցիայի կանխարգելման հանձնաժողովի անդամի թեկնածուի ընտրության հարցը. առաջադրվել է Մարիամ Գալստյանի թեկնածությունը:

Մանրամասները՝ տեսանյութում: