20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Հարկադիր պատվաստումից կխուսափեն հղիներն ու բարձր պաշտոնյաները․ ո՞ր տարբերակը կընտրեն մյուս աշխատողները․ ՏԵՍԱՆՅՈՒԹ
10.09.2021 | 19:02
Կա՛մ պատվաստվում եք, կա՛մ երկու շաբաթը մեկ հանձնում կորոնավիրուսի թեստ, որի բացասական լինելու դեպքում միայն կարող եք շարունակել գնալ աշխատանքի։ Այս պահանջը գործելու է հոկտեմբերի 1-ից․ կանոնը չի վերաբերում միայն հղիներին և հակացուցումներ ունեցողներին։
Կառավարության այս շաբաթվա նիստից հետո առողջապահության նախարար Անահիտ Ավանեսյանը հայտնեց, որ եթե մարդիկ հրաժարվեն ենթարկվել իրավական նոր կարգավորման պահանջներին, կլինեն հետևանքներ։
«Հետևանքն աշխատանքի ներկայանալու մեջ է լինելու, և հաջորդիվ, իհարկե, տվյալ կազմակերպությունը որոշակի տույժ-տուգանքներ կկրի կանոնները չպահելու համար։ Եթե աշխատակիցը չի ներկայանում աշխատանքի որոշակի ժամկետում, ապա գործատուն իրավունք ունի նաև խզելու աշխատանքային պայմանագիրը», – ասել է առողջապահության նախարար Անահիտ Ավանեսյանը։
Մինչ այս, նման մտադրություն կար միայն հանրային սննդի, հանրակրթության և նմանատիպ ոլորտների աշխատակիցների մասով։ Սակայն կորոնավիրուսի նոր ալիքը պատասխանատուներին ստիպել է խստացնել առաջադրվող կանոնները։ Ամերիկյան համալսարանի Հանրային առողջապահության ֆակուլտետի դեկան Վարդուհի Պետրոսյանը սա կապում է «դելտա» շտամի տարածման հետ։
«Քանի որ «դելտա» ենթատեսակն ավելի վարակիչ է, այսինքն՝ ավելի մեծ թվով մարդիկ միանգամից կարող են հիվանդանալ և ունենալ ինտենսիվ թերապիայից օգտվելու կարիք, և եթե դա տեղի է ունենում, հիվանդանոցները ծանրաբեռնվում են, դա ոչ միայն իրենց առողջության խնդիրն է, այլ նաև այն մարդկանց, որոնք այլ առողջական խնդիրներ ունեն, կարող են զրկվել այդ ինտենսիվ ծառայությունը ստանալուց»,- բացատրում է Պետրոսյանը։
ԵՊԲՀ Հանրային առողջության և առողջապահության ամբիոնի ավագ դասախոս Դավիթ Մելիք-Նուբարյանը ցավով է արձանագրում, որ պատվաստումների հարցում չհաջողվեց ձևավորել հանրային վստահություն, և հիմա իշխանությունը ստիպված է դիմել հարկադրանքի մեթոդների։ Ինչ վերաբերում է նման ծավալով պատվաստումներ ու թեստավորումներ անելուն, Մելիք-Նուբարյանը պնդում է, որ եղած ռեսուրսներով դա հնարավոր է։
«Մենք ունենք 38 պոլիկլինիկա ու ևս 241 գյուղական ամբուլատորիա, և եթե համապատասխան բազմապատկումները կատարենք, ապա կտեսնենք, որ մոտ 4 շաբաթում 440 հազարից ավելի մարդու կարելի է սպասարկել»,- բացատրում է Մելիք-Նուբարյանը։
Հայաստանում կորոնավիրուսի առաջին պատվաստումներից անցել է արդեն 6 ամիս։ Պատվաստման առաջին դեղաչափն արդեն ստացել է շուրջ 200 հազար մարդ։ Ավելի քան 100 հազար մարդ ստացել է նաև երկրորդ դեղաչափը և համարվում է ամբողջությամբ պատվաստված։
Այդուհանդերձ, այս ցուցանիշով անգամներով զիջում ենք հարևան բոլոր երկրներին։ Նաև այս պատճառով ԵՄ-ն Հայաստանը հեռացրել է համաճարակաբանական տեսանկյունից ապահով երկրների ցանկից։
Մանրամասները՝ տեսանյութում։
Գարիկ Հարությունյան
