25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
Թալիբներն արգելել են փողոցային ցույցերը, կանանց արգելվել է նաև սպորտով զբաղվել
Քաղաքականություն
09.09.2021 | 15:45
Աֆղանստանում իշխանությունը զավթած իսլամիստական «Թալիբան» շարժումն արգելել է փողոցային ցույցերը: Այս մասին ասված է թալիբների կառավարության ՆԳ նախարարության առաջին պաշտոնական հայտարարության մեջ: Հաղորդվում է, որ արգելքը խախտողներն ու բողոքի ակցիայի կազմակերպիչները կպատժվեն, գրում է DW-ի ռուսական ծառայությունը:
Բողոքի կազմակերպիչներն այսուհետ պետք է ոչ ուշ, քան 24 ժամ առաջ տեղեկացնեն Արդարադատության նախարարությանը բողոքի ակցիայի պատճառի, վայրի և ժամի, ինչպես նաև ենթադրյալ կարգախոսների մասին:
Որպես արգելքի պատճառ նշվել են հասարակական կարգի խախտումները, որոնք տեղ են գտել վերջին օրերին «Թալիբան»-ի դեմ բողոքի ցույցերի ընթացքում: Քաբուլում և Հերաթում թալիբները ցրել են բողոքի ակցիաները՝ օդ կրակելով։ Կան զոհեր:
Աֆղանստանում ցուցարարների թվում բազմաթիվ կանայք կան, որոնք դժգոհ են թալիբների սահմանած սահմանափակումներից:
Մասնավորապես, չորեքշաբթի «Թալիբան»-ի մշակութային հանձնաժողովի նախագահ Ահմուդալլահ Վասիկը ավստրալիական CBS հեռուստաալիքին տված հարցազրույցում ասել է, որ Աֆղանստանի կանանց կարգելվի սպորտով զբաղվել: Վասիկի խոսքով՝ սպորտային խաղերի ժամանակ դեմքի կամ մարմնի հատվածների բացման վտանգ կա, ինչը «ո՛չ տեղին է, ո՛չ էլ անհրաժեշտ»:
Տաթև Ֆռանգյան
