01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
Փարիզում սկսվել է 2015-ի ահաբեկչական հարձակումների շուրջ դատավարությունը
Քաղաքականություն
08.09.2021 | 23:28
Փարիզում չորեքշաբթի օրը սկսվել է 2015 թվականի ահաբեկչական հարձակումների մեջ մեղադրվողների դատավարությունը: Այս մասին գրում է «Ամերիկայի ձայն»-ը։
6 ամբաստանյալներին մեղադրանք է առաջադրվում հեռակա կարգով: Ըստ հաղորդագրությունների, վեցից հինգը սպանվել են Իրաքում եւ Սիրիայում:
Հիշեցնենք, որ Իսլամական պետություն ծայրահեղական խմբավորման ինն ահաբեկիչներ, որոնց մեծ մասը` Ֆրանսիայից ու Բելգիայից, այդ օրը հարձակումներ էին իրականացրել Ֆրանսիայի ազգային մարզադաշտում, բարերում ու ռեստորաններում, ինչպես նաեւ Բատակլանի թատրոնում անցկացվող համերգի ժամանակ: Հարձակումներին զոհ էր գնացել 130 մարդ: Նրանցից իննսունը զոհվել էր համերգի ժամանակ: Այստեղ 490 մարդ ստացել էր մարմնական վնասվածքներ:
Ինչպես այդ օրվա համերգի մասնակիցներից Ստեֆանի Թութլույանն է ասում, «Մենք ունենք այս ամենը հաղթահարելու պարտավորություն եւ առաջ շարժվելու կամք` հանուն նրանց, ովքեր չունեցան ողջ մնալու մեր բախտը: Դա նրանց ճակատագիրն էր, եւ նրանք հեռացան մեզնից: Ու եթե չենք ուզում, որ ահաբեկիչները հաղթեն, մենք պիտի շարունակենք հաճախել համերգներ, պետք է շարունակենք մեր կյանքն այնպես, ինչպես մենք ենք ցանկանում ապրել»:
Ահաբեկչական խմբի միակ ողջ մնացած տասներորդ անդամին` Սալահ Աբդեսլամին ձերբակալել էին Բրյուսելում 2015 թվականի նոյեմբերին: Նա մեղադրվում է հարձակումներն իրականացնողներին օգնելու մեջ:
Ֆրանսիայի պաշտոնատար անձինք երկուշաբթի օրը շուրջայց են իրականացրել Փարիզում հատուկ այս դատավարության համար կառուցված դատարանում, որտեղ դատավարությունը կարող է շարունակվել մի քանի ամիս:
Դատական նիստի հենց սկզբում, այն հարցին, թե ինչ մասնագիտություն ունի, Աբդեսլամինն ասել է, թե ինքը հրաժարվել է իր մասնագիտությունից, «Իսլամական պետության զինվոր դառնալու համար»:
Ինչպես Ֆրանսիայի իշխանություններն են հայտարարում, հատկապես այս օրերին հարկավոր է ցուցաբերել մեծ զգոնություն:
Անվտանգության նկատառումներով այստեղ են տեղակայվել ոստիկանության 10 հազար թվակազմով ուժեր:
