18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Լեհաստանի Սեյմը Բելառուսի հետ սահմանին արտակարգ դրություն մտցնելու որոշում է ընդունել
Քաղաքականություն
07.09.2021 | 16:42
Լեհաստանի Սեյմն ընդունել է Բելառուսի հետ սահմանին արտակարգ դրություն մտցնելու որոշումը՝ ապօրինի ներգաղթյալների թվի կտրուկ աճի պատճառով։ Որոշմանը կողմ է քվեարկել 247 խորհրդարանական, 168-ը՝ դեմ, 2-ը՝ ձեռնպահ։ Արտակարգ դրություն մտցնելու որոշմանը կողմ են քվեարկել իշխող «Օրենք ու արդարություն» կուսակցությունը, ինչպես նաև «Կոնֆեդերացիա» միավորումը, դեմ են եղել Քաղաքացիական կոալիցիան և ձախերը, գրում է DW-ի ռուսական ծառայությունը:
Անցյալ շաբաթ Լեհաստանի կառավարությունը արտակարգ դրություն մտցրեց Բելառուսի հետ սահմանին, սեպտեմբերի 2-ին հրամանագիրը ստորագրեց նախագահ Անջեյ Դուդան: Խորհրդարանն իրավունք ուներ չեղյալ հայտարարել որոշումը:
Արտակարգ դրությունը մտցվում է 30 օր ժամկետով, 183 բնակավայրերում: Այդ բնակավայրերում զանգվածային միջոցառումների անցկացումը ժամանակավորապես կարգելվի, հասարակական վայրերում գտնվող անձանցից կպահանջվի իրենց մոտ ունենալ անձը հաստատող փաստաթուղթ, իսկ այն քաղաքացիները, որոնք չեն բնակվում այդ տարածքում, ներառյալ՝ լրագրողները, չեն կարողանա մուտք գործել այդ բնակավայրեր:
Լեհաստանի ներքին գործերի և վարչակազմի նախարար Մարիուշ Կամինսկին հայտնել է, որ տեղի իշխանությունները կողմ են որոշմանը:
Տաթև Ֆռանգյան
