09.08.2026 | 00:05
Էդգար Սևիկյանը խաղացել է Մադրիդի «Ռեալի» դեմ. ՏԵՍԱՆՅՈՒԹ
Եվրախորհուրդը դատապարտել է Ստամբուլի դատարանի՝ Օսման Քավալայի դեմ կայացրած վճիռը
Հասարակություն
03.09.2021 | 17:11
Եվրախորհրդի մարդու իրավունքների հանձնաժողովը Թուրքիային մեղադրել է մարդու իրավունքների, ինչպես նաև ՄԻԵԴ-ի որոշումներին ենթարկվելու պարտավորությունը խախտելու համար: Պատճառը, գրեթե 4 տարի անազատության մեջ գտնվող թուրք գործարար Օսման Քավալայի ազատազրկման ժամկետը երկարացնելու Ստամբուլի դատարանի որոշումն է, տեղեկացնում է Ermenihaber-ը։
«Անատոլիական մշակույթ» (Anadolu Kültür) կենտրոնի հիմնադիր Օսման Քավալան, որին տարբեր մեղադրանքներ են առաջադրվել «Գեզի» զբոսայգու անկարգությունների, ինչպես նաև՝ 2016 թ․ հուլիսի 15-ի հեղաշրջման փորձի առթիվ հարուցված գործերով, արդեն 46 ամիս գտնվում է թուրքական բանտում։
Քավալան կալանավորվել է 2017 թվականին, իսկ 2019 թվականի մայիսին դիմել է Մարդու իրավունքների եվրոպական դատարան։ ՄԻԵԴ-ը վճռել է, որ թուրք պաշտոնյաները Քավալայի դեմ դատական գործ են հարուցել՝ վերջինին լռեցնելու նպատակով։
Եվրոպական խորհրդի Նախարարների կոմիտեն հունիսին հայտարարել էր, որ ՄԻԵԴ-ի որոշումներին չհնազանդվելու դեպքում Թուրքիայի դեմ «խախտման գործընթաց» կարող է հարուցվել, որի շրջանակում Եվրախորհուրդը պատժամիջոցներ է կիրառում եվրոպական օրենքները խախտող երկրների դեմ։ Ուշագրավ է, որ մինչ օրս նման պատժամիջոց կիրառվել է միայն մեկ անգամ, այն էլ՝ Ադրբեջանի նկատմամբ։
