Քաղաքականություն
01.09.2021 | 12:54
Վրաստանի կառավարությունը հրաժարվել է Եվրամիության ֆինանսական օգնության հաջորդ տրանշից: Այս մասին լրագրողներին հայտել է երկրի վարչապետ Իրակլի Ղարիբաշվիլին՝ որոշումը բացատրելով վերջին տնտեսական աճի հետ կապված նման օգնություն ստանալու անհրաժեշտության բացակայությամբ, գրում է DW-ի ռուսական ծառայությունը:
Կառավարության ղեկավարի խոսքով՝ եվրոպական օգնության երկրորդ տրանշից հրաժարվելու հիմնական պատճառը Թբիլիսիի արտաքին պարտքը նվազեցնելու ցանկությունն է:
«Գրուզիա օնլայնի» փոխանցմամբ էլ՝ խոսքը 75 միլիոն եվրո արժողությամբ օգնության ծրագրի մասին է, ինչի ստացումը սպառնալիքի տակ է հայտնվել այն բանից հետո, երբ իշխող «Վրացական երազանք» կուսակցությունը հրաժարվել է ընդդիմության հետ համաձայնագրի շրջանակում իր պարտականություններից, որոնք ձեռք էին բերվել Եվրոպական խորհրդի նախագահ Շառլ Միշելի նախաձեռնությամբ։ Հենց այդ համաձայնագրի կատարումն էր ֆինանսական օգնություն ստանալու պայմաններից մեկը։
Մինչ այդ, որոշ դիտորդներ ենթադրում են, որ ֆինանսավորումից պաշտոնապես հրաժարումը անախորժությունները թաքցնելու փորձ է։
Այսպես, ըստ տնտեսական հարցերի փորձագետ Գեորգի Խուխաշվիլիի՝ կառավարությունը «ձևացնում է, թե ֆինանսավորումը մերժել է ոչ թե ԵՄ-ն, այլ իրենք են հրաժարվել այդ գումարներից»:
Տաթև Ֆռանգյան
