Քաղաքականություն
30.08.2021 | 15:32
Եվրամիությունը ֆինանսական աջակցություն կտրամադրի Աֆղանստանի հարևան երկրներին՝ փախստականներին ընդունելու և տեղավորելու համար: Այս մասին Corriere della Sera պարբերականին տված հարցազրույցում ասել է ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը, գրում է ՏԱՍՍ-ը:
«Եվրոպայի հնարավորություններն ունեն իրենց սահմանները, առանց սերտ համագործակցության ոչինչ հնարավոր չէ անել: Հարևան երկրները կներգրավվեն գործընթացում ավելի շուտ և ավելի վաղ, քան Եվրոպան: Այսպիսով, այո՛, դա նաև նշանակում է այդ երկրներին ֆինանսական աջակցություն ցուցաբերել, ինչպես դա եղավ Թուրքիայի պարագայում»,- ասել է եվրոպական դիվանագիտության ղեկավարը:
Նրա կարծիքով՝ Եվրոպան պետք է դասեր քաղի Աֆղանստանի իրավիճակից, որպեսզի ամրապնդի «անդրատլանտյան հարաբերությունները և դրանք ավելի հավասարակշռված դարձնի»:
Բորելն ընդգծել է, որ ԵՄ-ն պետք է «սովորի աշխատել միասին և ամրապնդել ռազմավարական ինքնավարության գաղափարը»:
««ԵՄ ռազմավարական կողմնացույցում» մենք առաջարկում ենք ստեղծել արագ արձագանքնման եվրոպական ստորաբաժանում, որը կարող է արագ գործել արտակարգ իրավիճակներում: ԵՄ-ն պետք է կարողանա միջամտել՝ պաշտպանելու իր սեփական շահերը, երբ ամերիկացիները չեն ցանկանում միջամտել»,- շեշտել է նա։
Տաթև Ֆռանգյան
