Քաղաքականություն
26.08.2021 | 21:09
Թուրքիայի նախագահ Ռեջեփ Թայիփ Էրդողանը կրկին հայտնվել է քննադատությունների կենտրոնում։ Մասնավորապես, ընդդիմությունը նրան մեղադրում է Արժույթի միջազգային հիմնադրամից (ԱՄՀ) 6․4 մլրդ դոլար գումարի մուտքը հանրությունից թաքցնելու համար, գրում է «Ահվալ»-ը։
ԱՄՀ-ն Թուրքիան 6․4 մլրդ դոլարը տրամադրել է հատուկ իրավունքով՝ որպես միջազգային պահուստային ակտիվ, որը կարող է փոխանակվել օտար արտարժույթի հետ։
Ավելի վաղ, իր ելույթում Էրդողանը հայտարարել էր, որ որոշակի գործընթացների ավարտից հետո համախառն պահուստներն ավելանալու են՝ 109 մլրդ դոլարից հասնելով 115 մլրդ դոլարի։ Սակայն նա չէր նշել՝ ինչի մասին է խոսքը։
«Ի՞նչ գործընթաց է ավարտվելու։ Ումի՞ց ենք վախենում։ Ամաչո՞ւմ ենք ասել, որ «մենք գումար ենք խնդրել ԱՄՀ-ից», երբ նախկինում ասում էինք, որ «նրանք են մեզնից փող խնդրել»,- ասել է Ժողովրդահանրապետական կուսակցության փոխնախագահ Ֆաիկ Օզթրաքը։
Թուրքիան անցյալ տարի իր արտարժութային պահուստների վրա տասնյակ միլիարդավոր դոլարներ է ծախսել՝ պաշտպանելու լիրան և օգնելու պարտքեր կուտակած ընկերություններին։
«Էրդողանի կառավարությունը պահուստները վատնել է ոչնչի համար, դրանք գոլորշացել են»,- ասել է Օզթրաքը՝ հավելելով, որ հիմա, ամաչելու փոխարեն, նախագահը փորձում է ցուցադրել երկրի համախառն պահուստները՝ ԱՄՀ-ից կանխիկ գումար խնդրելով։
Էմմա Չոբանյան
