Տասնյակ պաղեստինցիներ են վիրավորվել Գազայի ու Իսրայելի սահմանին հակաիսրայելական բողոքի ցույցերի ժամանակ

Իսրայելի զինվորականներն ավելի քան մեկ տասնյակ պաղեստինցիների են վիրավորել Գազայի հատվածի և Իսրայելի կողմից վերահսկվող տարածքների միջև ընկած սահմանին, որտեղ պաղեստինցիները հավաքվել էին՝ ի նշան Գազայի շրջափակման դեմ բողոքի, գրում է Al Jazeera-ն:

Գազայի Առողջապահության նախարարության տվյալներով՝ վիրավորվել է 14 պաղեստինցի։

Բողոքի ցույցերը տեղի են ունեցել այն բանից հետո, երբ Գազայի հյուսիսում գտնվող Ջաբալիայից 32-ամյա պաղեստինցի Ուսամա Խալեդ Դեյջը մահացել է իսրայելական կողմի կրակոցների հետևանքով ստացած վիրավորումից: Դեյջը ծանր վիրավորվել էր շաբաթ՝ սահմանային ցանկապատի մոտ տեղի ունեցած բողոքի ցույցի ժամանակ, որի մասնակիցները դատապարտել են Իսրայելի կողմից Գազայի շրջափակումը, ինչպես նաև իրենց բողոքի ցույցը նվիրել 1969 թվականին Ալ-Աքսա մզկիթի հրկիզման 52-րդ տարելիցին:

Պաղեստինի Առողջապահության նախարարությունը հայտնում է, որ շաբաթ օրվա ցույցերի ընթացքում Իսրայելի կողմից արձակված կրակոցների արդյունքում վիրավորվել է ավելի քան 40 պաղեստինցի, այդ թվում՝ 13-ամյա մի պատանի, որը գլխի հատվածում վիրավորում է ստացել։

Հավելենք, որ վերջին շաբաթների ընթացքում լարվածությունն աճել է Իսրայելի և Գազայի սահմանների միջև անցնող ցանկապատի երկայնքով՝ Գազայի դեմ վերջին պատերազմից հետո Իսրայելի կողմից գոտու վերակառուցման ջանքերին խոչընդոտելու պատճառով:

Մինչ այդ, Al Jazeera-ի հաղորդմամբ, Իսրայելը հայտարարել է, թե թույլ կտա, որ ավելի շատ ապրանքներ և սարքավորումներ մուտք գործեն պաշարված Գազայի հատված՝ քաղաքացիական և միջազգային նախագծերի համար:

Տաթև Ֆռանգյան