Քաղաքականություն
26.08.2021 | 12:08ՀՀ վարչապետ Նիկոլ Փաշինյանն ԱԺ-ում դիմելով դահլիճում ներկա նախկին իշխանության ներկայացուցիչ` ընդդիմադիր խմբակցությունների անդամներին՝ անդրադարձավ «վիճարկելի տարածքներ» եզրույթին՝ պարզաբանելով, որ Որոտան-Շուռնուխ հատվածը վիճարկելի է դարձել «ՀՀ վարչատարածքային բաժանման մասին» օրենքով։ Բացի դրանից՝ Փաշինյանը նաև հիշեցրեց, որ դեռ 2010թ–ին նախագծված Հյուսիս–հարավ ճանապարհը չէր անցնում Որոտան–Շուռնուխ հատվածով։
«Բա որ դուք Հյուսիս-հարավի նախագիծը կազմում էիք, ինչո՞ւ Հյուսիս–հարավ ճանապարհը չէր անցնում Որոտան – Շուռնուխ հատվածով։ Այլ նախագծված է այնպես, որ պետք է թունելներ կառուցվեն, որը նախագիծը մի քանի տոկոսով թանկացնում է։ Բա ինչո՞ւ չեք տարել նախագիծն այդ կողմով։ Մե՞նք ենք վիճարկելի դարձրել։ Ո՛չ»,– ասաց Փաշինյանը` դիմելով նախկին իշխանության ներկայացուցիչներին։
Վարչապետը նաև հայտարարեց, որ Հյուսիս – հարավ ճանապարհի նախագծում չի նախատեսվել նաև Երասխ – Տիգրանակերտ – Զանգակատուն հատվածը։ Նրա խոսքով` այսօր բարձրացվվում է անկլավների փոխանակման խնդիրը, մինչդեռ տարիներ առաջ այդ հատվածը ինչ -որ անհայտ պատճառներով դուրս է թողնվել ճանապարհաշինական նախագծից։
Նիկոլ Փաշինյանը մանրամասներ ներկայացրեց ադրբեջանցի զինծառայողների կողմից Կապան-Գորիս միջպետական ճանապարհի Կարմրաքար-Շուռնուխ հատվածը փակելու վերաբերյալ:
Նա հայտարարեց, որ Կապան-Գորիս ճանապարհի այն հատվածներում, որոնք Խորհրդային Միության քարտեզներով Խորհրդային Հայաստանի տարածքից դուրս են եղել, ադրբեջանցիները եկել փակել են ճանապարհը՝ որպես պատճառ բերելով, թե գիշերը միջադեպ է տեղի ունեցել, և հայկական կողմից մարդիկ են մտել ու դանակահարել ադրբեջանցի սահմանապահներին:
«Մենք պաշտոնապես ասում ենք, որ այդ տեղեկությունը դանակահարության վերաբերյալ իրականությանը չի համապատասխանում: Եթե ադրբեջանական կողմը հիմնավորումներ ունի, որ այդպիսի բան եղել է, կոչ ենք անում, որ փոխանցեն մեզ, որպեսզի մենք էլ հետաքննենք հասկանանք, թե ինչ է»,- նշեց վարչապետը:
Մանրամասները՝ տեսանյութում:
