Ես վախենում եմ ձեր ծրագրից, ձեր խոստումները միայն աղետ ու ողբերգություն են բերում․ Էլինար Վարդանյան․ ՏԵՍԱՆՅՈՒԹ

«Այն, ինչ երկու օր կատարվում է այս դահլիճում, պարզապես խայտառակություն է, իրադարձությունները, որոնք տեղի են ունենում այս դահիճում, ունեն կոնկրետ ուղղորդում»,- ԱԺ նիստում իր ելույթն այսպես սկսեց «Հայաստան» դաշինքի պատգամավոր Էլինար Վարդանյանը:

Նա հավելեց, որ երեկվանից այս դահլիճում հնչեցին տարբեր մտքեր, վանկարկումներ, հայհոյանքներ. «Ամենավտանգավորն այն էր, որ ձեր ղեկավարն այս ամբիոնից քաջալերում էր բռնությունը, քաջալերում էր ձեր կողմից կիրառվող բռնությունը, քաջալերում էր ՊՊԾ-ի կողմից կիրառվող բռնությունը: Այդ նույն ղեկավարը 13 տարի առաջ ասում էր՝ հոգիս փառավորվում է, երբ մարդիկ փայտերով, մահակներով հարձակվում են ոստիկանների վրա: Երեկ, այդ նույն ձեր ղեկավարի հոգին փառավորվում էր, երբ նույն ՊՊԾ-ն բռնություն էր  գործադրում երիտասարդ  կնոջ  նկատմամբ: Հիմա մի հատ կողմնորոշվեք՝ ձեր հոգին ի վերջո ինչի՞ց է փառավորվում՝ երբ ՊՊԾ-ի հանդեպ են բռնություն կիրառո՞ւմ, թե՞  երբ ՊՊԾ-ն է բռնություն կիրառում»:

Վարդանյանի դիտարկմամբ՝ մեր պետությանը սպասվում են անորոշություններ, անկայանություն, ներքին մարտահրավերների բավականին բարդ փուլ:

«Ձեզ այնպես եք պահում, կարծես մեր պետության սահմանները չեն փոխվել, տարածաշրջանում մեր պետության կշիռը զրոյականի չեք հասցրել, չի զոհվել մի ողջ սերունդ, չի եղել պարտություն, մինչև երեկ դիեր չէին հայտնաբերվում…»,- նշեց «Հայաստան» դաշինքի անդամը՝ դիմելով իշխանական պատգամավորներին:

Վարդանյանն ընդգծեց, որ չի հավատում կառավարության ներկայացրած ծրագրին և այնպիսի տպավորություն ունի, որ հենց իշխանության անդամներն էլ այդ ծրագրին չեն հավատում:

«Հնարավոր չէ հավատալ մի իշխանության, որն ամեն ինչ և անընդհատ կեղծում է: Կեղծիքը դարձել է ձեր կրեդոն՝ կեղծել եք բանակցությունները, 44 օր կեղծել եք պատերազմը, նույնիսկ զոհերի, գերիների, անհետ կործաների թվերը հստակ չեք ասում: Դուք կեղծում եք  խոսքի ազատությունը, լրատվամիջոցների գործունեության ազատությունը, ժողովրդավարությունը: Ձեր ամեն խոստում հակառան է հուշում: Ասում եք՝ Արցախը Հայաստան է ու վերջ, հետո Արցախի  75 տոկոս կորուստ ենք ունենում… Ես չեմ կարող անընդհատ ստի վրա գործող իշխանությանը վստահել, որ նա կիրականացնի այդ ծրագիրը: Ոչ միայն չեմ հավատում ձեր ծրագրին, այլև մարդկանց խորհուրդ կտամ՝ վախեցե՛ք այդ ծրագրից, որովհետև ձեր  խոստումները միայն աղետ ու ողբերգություն են բերում»,- ընդգծեց Էլինար Վարդանյանը:

Մանրամասները՝ տեսանյութում: