ԱԺ-ում երբեք արտահայտած խոսքի համար որևէ կնոջ դահլիճից չէին հեռացրել․ սա աննախադեպ էր․ Թովմասյան. ՏԵՍԱՆՅՈՒԹ

«Պատիվ ունեմ» խմբակցության անդամ, Մարդու իրավունքների պաշտպանության և հանրային հարցերի մշտական հանձնաժողովի նախագահ  Թագուհի Թովասյանը ԱԺ ամբիոնից բոլոր պատգամավորների անունից ներողություն խնդրեց ՀՀ քաղաքացիներին  խորհրդարանում տեղի ունեցած միջադեպերի առնչությամբ:

«Կառավարության ծրագրի մարդու իրավունքների պաշտպանության գլխում իսկապես գեղեցիկ պատկերացումների շարան կա: Կառավարությունը որպես առաջնահերթություն դիտարկում է  անձանց խախտված իրավունքների վերականգնումը, և որն ամենակարևոր է՝ մարդու իրավունքների, ազատությունների երաշխավորման և պաշտպանության ինստիտուցիոնալ և համակարգված քաղաքականության շարունակական իրականացումը:

Մինչ այս ծրագիրը մենք քննարկում էին ԱԺ ոչ լիագումար նիստերի շրջանակում, Ֆիզիկայի գիտավանում բիրտ ուժ կիրառվեց մի խումբ երիտասարդների, նաև երեխաների նկատմամբ:

Այսինքն՝ կառավարությունը մի կողմից հռչակում է մարդու իրավունքների մասին անբեկանելի թեզեր, մյուս կողմից ոտնահարում մարդկանց իրավունքները»,- ասաց պատգամավորը:

Թովմասյանի գնահատմամբ՝ երեկ ԱԺ-ում տեղի ունեցածը աննախադեպ միջադեպ էր, որովհետև երբևէ որևէ պատգամավորի, որևէ կնոջ քաշքշելով, բռնությամբ, իր արտահայտած խոսքի համար չեն հեռացրել դահլիճից:

«Այդ ընթացքում պատգամավորների նկատմամբ բռնություն կիրառվեց անհամարժեք իրավիճակում: Ինձ համար անհասկանալի էր ՊՊԾ  պետ Սարգիս Հովհաննիսյանի ագրեսիվ վարքագիծը, որին միշտ համարել եմ պարկեշտ սպա»,- ասաց Թովմասյանը:

Դիմելով իշխանական խմբակցության ներկայացուցիչներին՝ Թովմասյանը հորդորեց քաղաքական խոսքի նկատմամբ լինել հանդուրժող, կարողանալ լսել իրենց հասցեին ուղղված քննադատությունը:

Մանրամասները՝ տեսանյութում: