Քաղաքականություն
24.08.2021 | 16:03Բանակի բարեփոխումների գործընթացի ռազմավարությունը և ճանապարհային քարտեզը վերջնականապես ձևավորված չէ։ Այս մասին այսօր՝ օգոստոսի 24-ին, ԱԺ-ում կառավարության ծրագիրը ներկայացնելիս ասաց վարչապետ Նիկոլ Փաշինյանը՝ պատասխանելով «Հայաստան» խմբակցության ղեկավար Սեյրան Օհանյանի այն հարցին, թե ՀՀ Զինված ուժերում ծրագրային բարեփոխումներն արդյոք չե՞ն թուլացնում մեր ռազմական ներուժը, և, թե ի՞նչ գործընթացի արդյունքում է կազմվել այդ բարեփոխումների պլանը։
«Մենք քաղաքական որոշակի նպատակադրումներ ենք ձևակերպում, որը պիտի դառնա արդյունքում փաստաթուղթ, որը պիտի ընդունվի անվտանգությն խորհրդում։ Ես չեմ տեսնում որևէ խոչընդոտ, որպեսզի դուք կամ որևէ մեր ընդդիմադիր գործընկեր այս կապակցությամբ արտահայտի դիրքորոշումներ։ Ես չեմ բացառում, որ դուք օրինակ՝ այսօր կամ վաղն այս ամբիոնից մի բան ասեք, որը մեզ համար կդառնա շատ համոզիչ փաստարկ։ Մենք ԶՈՒ-երը, անվտանգության օրակարգը մեր սեփականությունը չենք համարում, մենք երբեք չենք ասել՝ վայ մենք ամենալավն ենք դրանից հասկանում և չենք լսում այլ տեսակետներ»,- ասաց Փաշինյանը։
Վարչապետի խոսքով՝ Կառավարության պատկերացումները հիմնված են որոշակի վերլուծությունների, փորձագիտական որոշակի առաջարկությունների վրա:
«Մենք բանակի բարեփոխումները մեր էքսկլյուզիվ օրակարգը չենք համարում և շատ ուշադիր լսելու ենք բոլորը քննադատությունները՝ անկախ նրանից, թե այդ քննադատություններն ինչ տոնայնությամբ կասվեն»,- ասաց Փաշինյանը:
Սեյրան Օհանյանն էլ արձագանքեց, հայտարարելով, որ անվտանգային համակարգում առաջարկություններ անելու հանդիպման իր առաջարկները չի ընդունվել Փաշինյանի կողմից: Նա ընդգծեց, որ պաշտպանական ռազմավարական վերանայում պետք է իրականացվի և լուրջ ծրագիր կազմվի։
Փաշինյանը նշեց, որ մի քանի փաստաթղթերի նախագծեր են շրջանառվում և աշխատանք արվում է։
Մանրամասները՝ տեսանյութում:
