Պատերազմին մասնակցած՝ ոչ ծանր հանցանքների համար մեղադրվողների նկատմամբ համաներում կկիրառվի․ նախագիծ

Քննչական կոմիտեն առաջարկում է համաներում կիրառել ոչ մեծ և միջին ծանրության հանցանք կատարելու մեջ կասկածվող, մեղադրվող կամ այդ հանցագործությունը կատարելու համար դատապարտված այն անձանց նկատմամբ, ովքեր մասնակցել են Արցախյան 44-օրյա պատերազմին:

Առաջարկի շրջանառության մեջ է դրվել երեկ՝ E-draft իրավական ակտերի նախագծերի հրապարակման միասնական կայքում:

Նախագծի ընդունման արդյունքում կհայտարարվի համաներում, որը կտարածվի 2020 թվականի սեպտեմբերի 27-ից մինչև նոյեմբերի 9-ը ընկած ժամանակահատվածում Ադրբեջանի կողմից Արցախի դեմ սանձազերծած ռազմական գործողություններին մասնակցած՝ Հայաստանի Հանրապետության քրեական օրենսգրքի 32-րդ գլխով նախատեսված զինվորական ծառայության կարգի դեմ ուղղված հանցանք կատարելու մեջ կասկածվող, մեղադրվող կամ այդ հանցանքը կատարելու համար դատապարտված զինծառայող անձանց վրա, որով կկարգավորվեն պետություն-քաղաքացի որոշակի իրավական փոխհարաբերություններ։

«Արդյունքում, պետությունը, համաներում հայտարարելով, գնահատում է ռազմական գործողությունների ընթացքում իր զինված ուժերի կողքին կանգնելու քաղաքացիական պարտքի կատարման վեհ գործին նվիրումը, ինչին ի պատասխան ցուցաբերում է մարդասիրական մոտեցում զինվորական ծառայության կարգի դեմ ուղղված հանցագործություններ կատարած անձանց նկատմամբ»,- նշված է նախագծի հակիրճ բնութագրում:

Այս օրինագծում դրույթ է առանձնացվել, ըստ որի՝ համաներումը կկիրառվի նաև մինչև այս օրենքն ուժի մեջ մտնելը հետախուզման մեջ գտնվող այն անձանց նկատմամբ, որոնք մինչև 2022 թվականի փետրվարի 1-ը ներառյալ անձամբ կամովին կներկայանան քրեական հետապնդման մարմիններ, իսկ եթե գործը դատարանի վարույթում է` դատարան։

Ներկայացված նախագիծը E-draft-ում շրջանառության մեջ կմնա մինչև սեպտեմբերի 7-ը, ինչից հետո՝ օրինական ուժ ստանալու համար, դեռևս պետք է արժանանա կառավարության հավանությանը, ապա՝ ընդունվի Ազգային ժողովի կողմից։

Ռոզա Վարդանյան