Արևմուտքը կարող է պատժամիջոցներ կիրառել թալիբների դեմ․ «Մեծ յոթնյակը» քննարկելու է Աֆղանստանում ստեղծված իրավիճակը

Աֆղանստանից արևմտյան երկրների քաղաքացիներին և նրանց աֆղան դաշնակիցներին, որոնց կյանքը վտանգված է, տարհանելու հնարավորություններն ամեն օր նվազում են: Ստեղծված իրավիճակն այսօր կքննարկեն «Մեծ յոթնյակի» (G7 ) ղեկավարները արտահերթ հեռավար խորհրդակցության ժամանակ, որը հրավիրվել է Մեծ Բրիտանիայի վարչապետ Բորիս Ջոնսոնի նախաձեռնությամբ։

Հանդիպման հիմնական նպատակն է համոզել ԱՄՆ նախագահ Ջո Բայդենին երկարացնել օգոստոսի 31-ից հետո Աֆղանստանից քաղաքացիական անձանց տարհանման ժամկետները, այդ թվում նաև արևմտյան երկրների հետ համագործակցած աֆղանների համար։ Վաշինգտոնը չի բացառում ժամկետների երկարացումը, սակայն սա քիչ հավանական է թվում, գրում է Euronews-ը։

«Ինչպես ավելի վաղ ասել է նախագահը, մենք կարծում ենք, որ  մինչև օգոստոսի 31-ը ժամանակ ունենք բոլոր ամերիկացիներին, ովքեր ցանկանում են հեռանալ, տարհանելու համար»,- ասել է ԱՄՆ ազգային անվտանգության հարցերով խորհրդական Ջեյք Սալիվանը։

Իրենց հերթին թալիբները ակնհայտորեն թշնամաբար են վերաբերվում ժամկետների ցանկացած երկարացմանը՝ հայտարարելով, որ դա հետևանքներ կունենա։
«Եթե նրանք երկարաձգում են իրենց ներկայությունը, դա նշանակում է, որ նրանք երկարացնում են օկուպացիայի ժամկետները, չնայած դրա անհրաժեշտությունը չկա։ Կարծում եմ, որ դա մեր միջև անվստահության կհանգեցնի։ Եթե նրանք մտադիր են շարունակել օկուպացիան, դա կհանգեցնի համարժեք պատասխանի»,- հայտարարել է «Թալիբանի» ներկայացուցիչ Սուխայիլ Շահինը։

«Մեծ յոթնյակի» առաջնորդների հանդիպման ևս մեկ թեման կարող է դառնալ թալիբների դեմ պատժամիջոցները։ Որոշ տեղեկությունների համաձայն՝ Լոնդոնում կարծում են, որ «Մեծ յոթնյակը» պետք է դիտարկի տնտեսական պատժամիջոցներ կիրառելու հնարավորությունն ու օգնության դադարեցումը, եթե «Թալիբները» խախտեն մարդու իրավունքներն ու երկրի տարածքը վերածել ահաբեկիչների ապաստարանի։

Տաթև Ֆռանգյան