Քաղաքականություն
23.08.2021 | 21:08
Թուրքիան ձգտում է օգտագործել Աֆղանստանը իր տարածաշրջանային ու աշխարհաքաղաքական նկրտումներն առաջ տանելու համար․ այս մասին գրում է վերլուծաբան Սեթ Ֆրանցմանը։
«Թուրքիան ցանկանում է վերահսկել Աֆղանստանը որպես առանցքային ուղի դեպի Չինաստան ու Իրան, ինչպես նաև՝ ջիհադիստներին Իդլիբից Քաբուլ տեղափոխելու համար, ուստի՝ նրանց կարող է օգտագործել իր սեփական օրակարգի համար՝ դառնալու իսլամական աշխարհի առաջնորդ»,- Ֆրանցմանի խոսքերն է մեջբերում Ահվալ գործակալությունը։
Թուրքիան, որը բանակցում էր Քաբուլի օդանավակայանի անվտանգությունն ապահովելու համար, հիմա նույնն առաջարկում է Թալիբանին՝ ասելով, որ դա կօգնի նրանց միջազգային լեգիտիմություն ձեռք բերել։ Ըստ վերլուծաբանի՝ Թուրքիան պրագմատիկ նպատակներ ունի Թալիբանի հետ համագործակցելու համար, քանի որ դա կարող է առանցքային լինել Իրանի, Պակիստանի, Չինաստանի ու Ռուսաստանի վրա ազդեցություն ունենալու տեսանկյունից։
«1945-ին ԱՄՆ-ի ու ԽՍՀՄ-ի Բեռլին մուտքի պես, Թուրքիան սա համարում է առանցքային պահ։ ԱՄՆ-ի անկմանը զուգահեռ՝ համաշխարհային առաջնորդները կտեղափոխվեն 2021-ի Բեռլին, որը Քաբուլն է։ Հետամերիկյան աշխարհը, որն առաջանում է ԱՄՆ ահաբեկչության դեմ պայքարում, Թուրքիան, Ռուսաստանը, Չինաստանն ու Իրանը կաշխատեն միասին և ոչ թե միմյանց դեմ՝ ԱՄՆ թուլացնելու համար»,- գրում է վերլուծաբանը։
Նա նշում է, որ Թուրքիան նաև ձգտում է ուժեղացնել իր ազդեցությունը Աֆղանստանում, քանի որ Թալիբանի կողմից երկրի գրավումը փախստականների ճգնաժամ է ստեղծել։ Ըստ Ֆրանցմանի՝ Անկարան կօգտագործի փախստականներին Եվրոպական երկրներից ավելի շատ ֆինանսավորում ստանալու համար։
Էմմա Չոբանյան
