29.06.2026 | 17:37
Դիմումները կարդալիս տպավորություն է, թե ՀՀ ընտրազանգվածը զոմբի է․ ՍԴ դատավոր․ ՏԵՍԱՆՅՈՒԹ
Արարատի ոստիկանները մի ողջ զինանոց են հայտնաբերել․ ՏԵՍԱՆՅՈՒԹ
Հասարակություն
23.08.2021 | 17:23
Օգոստոսի 20-ին ոստիկանության Արարատի բաժնի ծառայողները օպերատիվ տեղեկություն էին ստացել, որ Արարատի մարզի Լուսառատ գյուղի բնակիչ, 23-ամյա մի երիտասարդ Փոքր Վեդիում կրակել է ապօրինի պահվող հրազենից:
Ինչպես տեղեկացնում են ՀՀ ոստիկանությունից, ձեռնարկված միջոցառումների և բացատրական աշխատանքի արդյունքում երիտասարդը ներկայացավ բաժին` բերելով ինքնաձիգ ու դատարկ պահունակ: Ըստ նրա, փորձարկելու նպատակով, Արցախյան վերջին պատերազմի օրերին բերած ինքնաձիգից մի քանի անգամ օդ էր կրակել Փոքր Վեդի գյուղի հարակից դաշտում:
Օգոստոսի 22-ին երիտասարդի բնակության վայրում` Լուսառատ գյուղում, կատարվեց խուզարկություն: Տանն ու օժանդակ կառույցներում Արարատի ոստիկանները հայտնաբերեցին մի ողջ զինանոց, մասնավորապես` տարատեսակ չորս հրացան, երկու նռնակ ու երկու պայթուցիչ, սվին-դանակ ու երկու զրահաբաճկոն, արկղերով փամփուշտներ, դատարկ ու լիցքավորված փամփշտակալներ, ընդհանուր՝ շուրջ հինգուկես հազար փամփուշտ:
Ապօրինի զենք-զինամթերքի վերաբերյալ երիտասարդի հայրը հայտնել է, որ դրանք ինքն էր բերել վերջին պատերազմի ժամանակ:
62-ամյա հայրը ձերբակալվել է: Հայտնաբերվածն ուղարկվել է փորձաքննության: Հարուցված քրեական գործի նախաքննությամբ հանգամանքները պարզվում են:
Ինչպես երեկ տեղեկացրել էինք, ԵԿՄ ՀԿ Արարատի տարածքային ստորաբաժանման նախագահը ձերբակալվել է ապօրինի զենք-զինամթերք պահելու կասկածանքով։
