14.11.2024 | 19:29
Իսրայելը հարվածներ է հասցրել Դամասկոսի կենտրոնին
Մեծ Բրիտանիայի վարչապետ Թերեզա Մեյը հայտարարել է 23 ռուս դիվանագետի արտաքսման մասին
Քաղաքականություն
14.03.2018 | 17:42
Մեծ Բրիտանիան «Սկրիպալի գործի» առնչությամբ 23 ռուս դիվանագետի կարտաքսի: Այս մասին պառլամենտում ելույթ ունենալիս՝ հայտարարել է Միացյալ Թագավորության վարչապետ Թերեզա Մեյը. փոխանցում է interfax.ru-ն:
«Նրանք երկրից հեռանալու համար մեկ շաբաթ ժամանակ ունեն»,- հայտարարել է Մեյը:
Նրա խոսքով՝ վերջին 30 տարվա ընթացքում, դա ամենամեծ արտաքսումն է: «Սա արտացոլում է այն փաստը, որ ռուսական պետությունը առաջին անգամը չէ, որ գործում է մեր երկրի դեմ», – ասել է նա:
Մեծ Բրիտանիայի վարչապետը նաև հավելել է, որ Ռուսաստանը ոչ մի համոզիչ բացատրություն չի տվել նախկին գնդապետ Սերգեյ Սվիտալի թունավորման հետ կապված:
Հիշեցնենք, որ ՌԴ հետախուզական գլխավոր վարչության նախկին աշխատակից Սերգեյ Սկրիպալը և նրա դուստր Յուլյան նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։
Ըստ Մեյի՝ բրիտանական կառավարությունը եկել է այն եզրակացության, որ Ռուսաստանի կառավարությունը «պատասխանատու է այս թունավորման համար»:
Նշենք նաև, որ ՌԴ արտգործնախարար Սերգեյ Լավրովը հայտարարել էր, որ ռուսական կողմը չի պատասխանի «Սկրիպալի գործի» վերաբերյալ Լոնդոնի վերջնագրին, մինչև Մեծ Բրիտանիան չկատարի քիմիական զենքի արգելման մասին հռչակագրի շրջանակում իր ստանձնած պարտավորությունները և չապահովի նյութին հասանելիությունը, որով թունավորվել են ՌԴ հետախուզական գլխավոր վարչության նախկին աշխատակից Սերգեյ Սկրիպալը և նրա դուստր Յուլյան:
Թերեզա Մեյը ռուս դիվանագետների արտաքսումը բացատրել է նրանով, որ դիվանագետները ռուսական գաղտնի հետախուզության աշխատակիցներ են: Չեղարկվել է Մեծ Բրիտանիա այցելելու համար ՌԴ արտգործնախարար Սերգեյ Լավրովին ուղարկված հրավերը: Նշվել է, որ բրիտանացի նախարարները և բարձրաստիճան պաշտոնյաները չեն այցելի Ռուսաստանում կայանալիք Ֆուտբոլի աշխարհի առաջնությանը:
Նշենք, որ Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին ապաստան էր ստացել Մեծ Բրիտանիայում. նրան փոխանակել են ԱՄՆ-ում ձերբակալված ռուս գործակալների հետ:
