09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Մոսկվան հրաժարվել է պատասխանել «Սկրիպալի գործի» վերաբերյալ Լոնդոնի վերջնագրին
Քաղաքականություն
13.03.2018 | 17:36
Ռուսական կողմը չի պատասխանի «Սկրիպալի գործի» վերաբերյալ Լոնդոնի վերջնագրին, մինչև Մեծ Բրիտանիան չկատարի քիմիական զենքի արգելման մասին հռչակագրի շրջանակում իր ստանձնած պարտավորությունները և չապահովի նյութին հասանելիությունը, որով թունավորվել են ՌԴ հետախուզական գլխավոր վարչության նախկին աշխատակից Սերգեյ Սկրիպալը և նրա դուստր Յուլյան: Այս մասին հայտարարել է ՌԴ արտգործնախարար Սերգեյ Լավրովը. փոխանցում է interfax.ru-ն:
«Մինչ վերջնագիր ներկայացնելը, այն է՝ բրիտանական կառավարությանը 24 ժամվա ընթացքում հաշվետվություն ներկայացնելը, ավելի լավ է հետևեն միջազգային իրավունքի իրենց ստանձնած պարտավորությունների կատարմանը, տվյալ դեպքում`քիմիական զենքի արգելման մասին համաձայնագրին, – ասել է Լավրովը Մոսկվայում կայացած մամուլի ասուլիսի ընթացքում, ապա հավելել:- Մենք ակնկալում ենք, որ Միացյալ Թագավորությունը կարձագանքի մեր հարցմանը, քանի որ խոսքը Ռուսաստանի քաղաքացու (Սերգեյ Սկրիպալի-խմբ.) մասին է»:
Նախօրեին Մեծ Բրիտանիայի վարչապետ Թերեզա Մեյը հայտարարել էր, որ Բրիտանիայի կառավարությունը եկել է այն եզրահանգման, որ Սկրիպալի ու նրա դստեր թունավորմանը «մեծ հավանականությամբ» ներգրավված է Ռուսաստանը: ՄԹ վարչապետը նաև հաղորդել է, որ տուժածները թունավորվել են «Նորույթ» կոչվող քիմիական նյարդապարալիտիկ նյութով, որը մշակվել է ՌԴ-ում: Նա ՌԴ-ին ժամանակ էր տվել մինչև մարտի 13-ը միջադեպի առնչությամբ մանրամասն պարզաբանումներ տրամադրելու համար, հակառակ դեպքում՝ Մոսկվայի դեմ լուրջ քայլերի ձեռնարկում է նախատեսվում:
Հիշեցնենք, որ մարտի 5-ին Սոլսբերի քաղաքի ոստիկանությունը հաղորդել էր, որ քաղաքի առևտրի կենտրոններից մեկում անհայտ ծագման վտանգավոր նյութից անգիտակից վիճակում հիվանդանոց է տեղափոխվել երկու անձ։ Հետագայում պարզվել է, որ խոսքը Սկրիպալի և նրա դստեր մասին է: Այժմ նրանք գտնվում են հիվանդանոցում՝ ծայրահեղ ծանր վիճակում:
Նշենք, որ Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին ապաստան էր ստացել Մեծ Բրիտանիայում. նրան փոխանակել են ԱՄՆ-ում ձերբակալված ռուս գործակալների հետ:
