Քաղաքականություն
17.08.2021 | 22:05
Դժվար է ընդունել ու հասկանալ Անկարայի անկարողությունը հրդեհների ու ջրհեղեղների դեմ պայքարում անցյալ երկու շաբաթներին։ Այս մասին ասել է թուրք հայտնի գրող, Նոբելյան մրցանակակիր Օրհան Փամուկը, գրում է Ահվալ գործակալությունը։
Նա նշել է, որ թուրք հասարակության զայրութը կառավարության ու քաղաքական գործիչների նկատմամբ, որոնք խոստացան միայն մարդկանց վերքերը բուժել, արդարացված է։
«Սխալ է, նույնիսկ տարօրինակ է մտածել, որ զայրացած ամբոխը կհանգստանա ավտոբուսի դռներից թեյ նետելով նման աղետի ժամանակ»,- ասել է Փամուկը՝ նշելով, որ հրդեհից հետո գյուղացիների հարցազրույցները դիտելիս մեղքի ու զայրույթի զգացում է ունեցել։
Հիշեցնենք, որ հուլիսի 28-ից Թուրքիայի հարավային նահանգներում ավերիչ անտառային հրդեհներ էին բռնկվել, իսկ ահա օգոստոսի 11-ին տեղացած առատ անձրևներն էլ երկրի հյուսիսում ջրհեղեղներ են առաջացրել։ Թուրքական հասարակությունում մեծ դժգոհություն է առաջացել նախագահ Ռեջեփ Թայիփ Էրդողանի ու իշխող ուժի նկատմամբ՝աղետները ժամանակին ու ճիշտ չկառավարելու պատճառով։
Էմմա Չոբանյան
