30.07.2026 | 22:30
Երևանի և 5 մարզի մի շարք հասցեներում էլեկտրաէներգիայի անջատումներ կլինեն
Ալեն Սիմոնյանն ընդունել է Ուրուգվայի ԱԳ նախարարին
Քաղաքականություն
17.08.2021 | 15:59
Օգոստոսի 17-ին ՀՀ ԱԺ նախագահ Ալեն Սիմոնյանն ընդունեց Ուրուգվայի Արեւելյան Հանրապետության արտաքին գործերի նախարար Ֆրանսիսկո Բուստիժո Բոնասսոյի գլխավորած պատվիրակությանը: Այս մասին տեղեկանում ենք ԱԺ մամուլի ծառայությունից։
Ողջունելով հյուրին՝ օրենսդիր մարմնի ղեկավարը նշեց, որ Հայաստանը մեծապես կարեւորում է Ուրուգվայի հետ հարաբերությունների զարգացումը եւ ամրապնդումը:
Անկախ այն փաստից, որ Հայաստանին եւ Ուրուգվային բաժանում է աշխարհագրական չափազանց մեծ հեռավորությունը, դրանից մեր երկրների եւ ժողովուրդների հարաբերությունները երբեք չեն տուժել, ընդգծեց Ալեն Սիմոնյանը:
Խոսելով հայ-ուրուգվայական միջպետական կապերի մասին՝ խորհրդարանի ղեկավարը նշեց, որ դիվանագիտական հարաբերությունների հաստատումից ի վեր հաջողվել է ծավալել փոխշահավետ համագործակցություն. Մեր երկրների միջեւ բարեկամությունը հիմնված է փոխադարձ հարգանքի, վստահության եւ փոխաջակցության վրա:
Ալեն Սիմոնյանը գոհունակություն հայտնեց 2019-ին Երեւանում Ուրուգվայի գլխավոր հյուպատոսության բացման կապակցությամբ, ինչը կարեւոր խթան է երկկողմ փոխգործակցության համար: ԱԺ նախագահը նաեւ ողջունեց առաջիկայում Հայաստանում Ուրուգվայի դեսպանատան բացումը:
Շնորհակալություն հայտնելով ընդունելության համար՝ Ուրուգվայի ԱԳ նախարարը տեղեկացրեց, որ սա իր առաջին այցն է Հայաստան: Հյուրը խոսեց երկկողմ հարաբերությունները զարգացնելու անհրաժեշտությունից:
Հանդիպման ընթացքում անդրադարձ կատարվեց նաեւ բարեկամական խմբերի միջեւ համագործակցությանը: Ալեն Սիմոնյանը համոզմունք հայտնեց, որ առաջիկայում կստեղծվի Ուրուգվայի հետ ներկայացուցչական կազմով բարեկամական խումբ:
Անդրադառնալով Հայոց ցեղասպանության ճանաչման գործընթացին՝ Ալեն Սիմոնյանը փաստեց. Հայաստանում բոլորը գիտեն, որ Ուրուգվայը Հայոց ցեղասպանությունը ճանաչած առաջին երկիրն է: Այս համատեքստում Ֆրանսիսկո Բուստիժո Բոնասսոն տեղեկացրեց, որ երեկ այցելել է Ծիծեռնակաբերդի հուշահամալիր եւ գրառում կատարել Պատվավոր հյուրերի հուշամատյանում: Նա նշել է, որ Հայաստանի պատմությունը կարելի է ամփոփել երկու բառի մեջ՝ ցավ եւ հույս: Ցավ, որին ողջ պատմության ընթացքում առերեսվել է հայ ժողովուրդը, բայց հույս՝ հետագա հրաշալի ապագայի համար, որը սպասում է հայ ժողովրդին,-հավելեց հյուրը:
Կողմերը խոսեցին նաեւ Ուրուգվայում մեծաթիվ հայ համայնքի մասին՝ ընդգծելով նրա դերը հայ-ուրուգվայական կապերի ամրապնդման գործում:
