30.06.2026 | 03:40
ԱԱ-2026. Գերմանիան դուրս մնաց պայքարից. ՏԵՍԱՆՅՈՒԹ
Թուրքիան հրաժարվում է Քաբուլի օդանավակայանի անվտանգության ապահովումից․ The Reuters
Քաղաքականություն
17.08.2021 | 13:02
ՆԱՏՕ-ի՝ Աֆղանստանից դուրս գալուց հետո Թուրքիան հրաժարվում է Քաբուլի օդանավակայանի անվտանգության ապահովումից, սակայն պատրաստ է աջակցություն ցուցաբերել, եթե Թալիբանը խնդրի։ Այս մասին Reuters գործակալությանը հայտնել են թուրքական աղբյուրները։
Թուրքիան մինչ այս առաջարկել էր իր 600 զինծառայողներին պահել Քաբուլում՝ օդանանավակայանի պաշտպանության համար ու մանրամասները քննարկում էր Վաշինգտոնի ու նախագահ Աշրաֆ Գանի կառավարության հետ։ Սակայն այդ պլանները ձախողվեցին վերջին երկու օրվա ընթացքում, երբ նախագահ Գանին լքեց երկիրը, Թալիբանը մտավ Քաբուլ և հազարավոր աֆղանցիներ երկրից փախչելու հույսով ներխուժեցին օդանավակայան։
«Այս պահին Քաբուլի օդանավակայանում լիակատար քաոս է։ Կարգուկանոնը ամբողջությամբ խաթարված է։ Այս փուլում, թուրք զինծառայողների կողմից օդանավակայանի վերահսկողությունը վերցնելու գործընթացը ավտոմատ կերպով դադարեցված է։ Սակայն, եթե Թալիբանը տեխնիկական աջակցություն խնդրի, Թուրքիան կարող է օդանավակայանում անվտանգություն ու տեխնիկական աջակցություն ապահովել»,- ասել է լրատվամիջոցի աղբյուրը անանունության պայմանով։
Մինչ Թալիբանի մուտք գործելը Քաբուլ թուրք պաշտոնյաներն ասում էին, որ Անկարան հավատարիմ է իր ծրագրերին և կսպասի տեսնելու՝ ինչպես կզարգանան իրադարձությունները վերջնական որոշում ընդունելուց առաջ։
Թուրքիան օդանավակայանի առաքելությունը դիտարկում էր որպես համագործակցության պոտենցիալ ոլորտ, որը կօգներ վերակագնել Վաշինգտոնի ու ՆԱՏՕ-ի այլ դաշնակիցների հետ խաթարված հարաբերությունները։
Էմմա Չոբանյան
