Քաղաքականություն
17.08.2021 | 12:08
Երևան քաղաքի ընդհանուր իրավասության առաջին ատյանի դատարանում այսօր կշարունակվի ՀՀ երկրորդ նախագահ Ռոբերտ Քոչարյանի և նախկին փոխվարչապետ, այժմ «Հայաստան» դաշինքի պատգամավոր Արմեն Գևորգյանի գործով դատական նիստը։
Նշենք, որ նախորդ երկու նիստերին ամբաստանյալ Գևորգյանը դատական նիստերին չէր մասնակցում, պատճառաբանելով, որ գործի քննությունը զուգադիպում է Ազգային ժողովի նիստերի հետ։
Ինչպես մեղադրանքի կողմը, այնպես էլ դատարանն անընդունելի է համարում Գևորգյանի նման պատճառաբանությունը։ Նրանց դիտարկմամբ՝ դատական նիստերը չպետք է խոչընդոտվեն կողմնակի գործողություններով։
Նախորդ նիստին դատավոր Աննա Դանիբեկյանը որոշում կայացրեց բերման ենթարկել Արմեն Գևորգյանին, այնինչ պաշտպանական կողմն էլ իր հերթին հայտարարեց՝ թույլ չի տալու հարկադրաբար բերման ենթարկել Գևորգյանին։
Թեև այսօր էլ Ազգային ժողովում արտահերթ նիստ է ընթանում և Գևորգյանը ներկա է նիստին, այնուամենայնիվ երեկ Factor.am-ի հետ զրույցում պաշտպան Էրիկ Ալեքսանյանը տեղեկացրեց, որ իր պաշտպանյալը ներկայանալու է դատարան։
Հիշեցնենք, որ Ռոբերտ Քոչարյանն ու Արմեն Գևորգյանը մեղադրվում են առանձնապես խոշոր չափերի կաշառք ստանալու մեջ:
Ռոզա Վարդանյան
