14.12.2024 | 19:57
Ինչ իրավիճակ է ճանապարհներին 19։35-ի դրությամբ
ԵՐԵՎԱՆԻ ԺԱՄԱՆԱԿՈՎ․ Այս խորհրդարանը չի կարող կառուցողական լինել, սա կոսմետիկ հարցերով զբաղվող կառույց է․ Եղիշե Պետրոսյան․ ՏԵՍԱՆՅՈւԹ
Քաղաքականություն
16.08.2021 | 17:02
«Այս խորհրդարանը չի կարող կառուցողական լինել, սա կոսմետիկ հարցերով զբաղվող կառույց է, որտեղ իշխանական և ընդդիմադիր թևերն իրար են մեղադրելու, և բովանդակային որևէ քննարկում չի լինելու»,-Factor TV-ի հետ զրույցում նման տեսակետ է հայտնում երաժիշտ, երգահան Եղիշե Պետրոսյանը։
Նրա համոզմամբ՝ եթե իշխող ուժը կառուցողական լիներ, պետք է զբաղվեր Հայաստանին պատուհասած խնդիրների լուծմամբ․ «Քիրվայությամբ ապրելը, պարտադրված պարտության հետ համակերպվելն անթույլատրելի է»,-ասում է պարոն Պետրոսյանը։
Ինչ վերաբերում է խորհրդարանում ներկայացված ընդդիմադիր թևին, երգահանը նկատում է․
«Ընդդիմադիրներին մենք լավ գիտենք, նրանց անցած ճանապարհն էլ ենք տեսել։ Եթե այս իշխանությունն ամբոխավար է, ապա ընդդիմությունը դիկտատի ձգտող ուժ է։ Այնպես որ, խորհրդարանում հայտնված թե´ իշխանական, թե´ ընդդիմադիր ուժերն ինձ համար մերժելի են»։
Եղիշե Պետրոսյանը խոսում է նաև այն մասին, որ հանրային օրակարգում մի շարք անկարևոր թեմաների ֆոնին ստվերվում է, օրինակ, հայ գերիների վերադարձի թեման․
«Պետք է միջազգային ատյանների դռները ջարդել, որպեսզի գերիներին վերադարձնենք, այլապես Ադրբեջանում հերթական ցեղասպանական գործողություններն են իրականացվում։ Ո՞վ պետք է դրանց դեմն առնի։ Եկեք մենք էլ դատի տանք ադրբեջանական կողմի պատերազմական հանցագործներին․ պետք է իրենց հետ իրենց լեզվով խոսել, ոչ թե Քրիստոսից ավելի քրիստոնյա ձևանալ»։
Երգահանն անդրադառնում է նաև երկրի համար վճռորոշ պահերին մտավորականության դերին․
«Քիչ թվով մտավորականների գիտեմ, որոնք ապրում են երկրի դարդ ու ցավով։ Նրանցից շատերը, մասնագիտական գործերն անելով, համարում են, որ իրենց միսիան ավարտված է, այնինչ, մտավորականը պետք է ազգի կյանքով քնի ու զարթնի։ Բայց այդ խավն էլ վարկաբեկվեց․ զգալի մասը դարձավ հանդուրժող և հարմարվող։ Մեզ մոտ հասարակության բոլոր շերտերում դեգրադացիա է, այդ պատճառով էլ ունենք բզկտված հասարակություն․ այդ վիճակով չէինք կարող պատերազմում հաղթել։ Մտավորականությունը պետք է ժողովրդի հետ աշխատի, իսկ ժողովրդի քիթը մինչև գետնին չդիպչի, խելքի չի գա»։
Մանրամասները՝ տեսանյութում։
Աննա Բաբաջանյան
