21.12.2025 | 17:38
Կենդանասերներն ահազանգում են․ շանը փակ բեռնախցիկում են պահել, գլխով լուսարձակը կոտրել է, որ կարողանա շնչել
Որոշ մարդիկ խոսքի ազատությունը խառնել են լկտիության հետ. Ալեն Սիմոնյան․ ՏԵՍԱՆՅՈւԹ
Քաղաքականություն
12.08.2021 | 11:24
Ազգային ժողովի շենքում լրագրողների աշխատանքը համակարգվելու է: Ազգային ժողովի ամբիոնից այս մասին հայտարարեց Ազգային ժողովի նախագահ Ալեն Սիմոնյանը՝ անդրադառնալով ընդդիմադիր պատգամավոր Գեղամ Մանուկյանի ելույթին, որտեղ նա իշխանությանը քննադատել է լրատվական դաշտի նկատմամբ սահմանափակումներ կիրառելու համար:
Հակադարձելով Գեղամ Մանուկյանին, ով հայտարարել էր, թե լրատվամիջոցների նկատմամբ ճնշումները համակարգային բնույթ է սկսել կրել, Սիմոնյանը նկատեց, որ երբևէ լրատվական դաշտում այնքան ընդդիմադիր լրատվամիջոցներ չեն եղել, որքան կան այսօր:
ԱԺ նախագահն ընդգծեց, որ որոշ մարդիկ խոսքի ազատությունը խառնել են լկտիության հետ:
«Լրագրողները հնարավորություն են ունենալու պատգամավորներին մոտենալ, երբ նրանք գալիս են շենք, նույն հարցազրույցները անել, բայց, կներեք, չեն գնալու, դուռը չեն բացելու, մտնեն պատգամավորի սենյակ: Չեն վազելու պատգամավորի հետևից, որովհետև դա անհարգալից վերաբերմունք է թե´ լրագրողի նկատմամբ, թե´ պատգամավորի նկատմամբ: Հաճախ խոսում ենք պատգամավորների, քաղաքական գործիչների վարվելակերպի հետ կապված, բայց Հայաստանի Հանրապետության քաղաքացիների մի ստվար զանգված դժգոհ է լրագրողների աշխատանքից և վարվելաձևից»,- ասաց Սիմոնյանը:
Ազգային ժողովի նախագահը դիմեց նաև այն լրագրողներին, ովքեր սոցիալական ցանցերում վիրավորանքներ են հնչեցնում քաղաքական գործիչների, պետական պաշտոյնաների հասցեին:
«Հարգելինե՛րս, մի՛ համարեք, որ դուք իրավունք ունեք հասարակական հարթակներում, սոցիալական ցանցերում վիրավորանքներ հնչեցնել պետական պաշտոնյաների, ազգային ժողովի պատգամավորների, հասարակական գործիչների նկատմամբ և հետո զարմանալ, որ իրենք ձեզ հարցազրույց չեն տալիս կամ փորձում են համակարգել աշխատանքը, որպեսզի դուք միջանցքներով չվազեք, այլ լինի կոնկրետ տեղ, որտեղ կմոտենա պատգամավորը, իշխանության ներկայացուցիչը և հարցազրույց կտա»,- ասաց Սիմոնյանը:
