Ինչ գին է ունենալու ապաշրջափակումը, ունե՞ք փաթեթը. Տիգրան Աբրահամյան․ ՏԵՍԱՆՅՈւԹ

Շատ կարևոր է հասկանալ, թե ԱԺ արտաքին հարաբերությունների հանձնաժողովի նախագահի պաշտոնին հավակնող թեկնածուն ինչպես է պատկերացնում մեր արտաքին քաղաքական օրակարգը, կարևորագույն հարցերի հետ կապված ինչ դիրքրորոշումներ ունի: ԱԺ արտաքին հարաբերությունների նախագահի ընտրության հարցի քննակման ժամանակ այս մասին նշեց  «Պատիվ ունեմ» խմբակցության պատգամավոր Տիգրան Աբրահամյանը:

Պատգամավորի խոսքով՝ իշխանության ներկայացուցիչներն ու ՔՊ խմբակցության պատգամավորները բանակցային գործընթացի տապալման տարբեր պատճառներ են նշում՝ պայմանավորված տարբեր տարիներին տեղի ունեցած իրադարձություններով՝ հասնելով ընդհուպ մինչև Բաթումի պայմանագիր ու 90-ականների իրադարձություններ:

Աբրահամյանը մանրամասնեց, թե իրականում ինչ էր տեղի ունենում առաջնագծում, երբ Դուշանբեում դրվում էին «վերելակային դիվանագիտության» հիմքերը։

«Օրինակ՝ 2018 թվականին, երբ Դուշանբեում կայացան հայտնի պայմանավորվածությունները, հանդիպումները, քննարկումները, որոնք ստացան «վերելակային դիվանագիտություն» արտահայտությունը, այդ ժամանակ բոլոր կողմերին՝ և՛ Հայաստանին, և՛ Արցախին, և՛ Ադրբեջանին հրաման էր իջեցված՝ առաջնագծում հնարավորինս  նվազեցնել հրաձգությունը, փոխհրաձգությունը և այլն։ Այդ ժամանակահատվածում, իսկապես, ունեցանք առաջնագծում գրանցվող հրադադարի ռեժիմի, մարդկային կորուստների, վիրավորումների էական նվազում, ինչը  առիթ տվեց ձեզ, ձեր ղեկավարներին՝ խոսելու, որ իրականում գործընթացը կառուցողական տեսանկյունով է գնում։ Դա  առիթ տվեց ձեր ղեկավարին հայտարարելու, որ Ալիևը հանդիպումներում «կիրթ», «կառուցողական» տպավորություն է թողնում, բայց իրականում այլ բան էր տեղի ունենում առաջնագծում:

Առաջնագծի այն հատվածներում, որտեղ մինչև այդ Ադրբեջանը հնարավորություններ չուներ  ստեղծելու անհրաժեշտ ենթակառուցվածքներ, պաշտպանական համակարգ, պաշտպանության, հակահարձակման և հարձակման հնարավորություններ,  այդ ժամանակահատվածում նա օգտվեց դիվանագիտական այդ փուլի «փուչիկից», ստեղծեց իր համար անհրաժեշտ հնարավորություններ, ինչը հետագայում՝ 2020 թվականի գործողությունների համար, կարևորագույն մեկնարկային առավելություն ապահովեց նրանց համար»։

Անդրառնալով խաղաղության պայմանագրի հնարավոր ստորագրմանը՝ Աբրահամյանը հարցադրում արեց. «Ի՞նչ է ենթադրում այդ փաթեթը… Ես չեմ անդրադառնա Ադրբեջանի առաջարկներին, բայց եթե դուք ասում եք՝ խաղաղություն ենք ուզում, դրա շուրջ է գործընթացը, պետք է ներկայացնեք՝ ի՞նչ առարկայական առաջարկներ եք սեղանին դրված… Ի՞նչ գին է ունենալու ապաշրջափակումը Հայաստանի համար, ունե՞ք փաթեթը, ունե՞ք անհրաժեշտ ինստիտուտները, որոնք ապահովելու են ապաշրջափակման դեպքում բնականոն գործունեությունը»:

Մանրամասները՝ տեսանյութում: