Քաղաքականություն
11.08.2021 | 10:22ԱԺ «Քաղաքացիական պայմանագիր» խմբակցության պատգամավոր Մարիա Կարապետյանն այսօր ԱԺ նիստում անդրադարձավ «Հայաստան» խմբակցության պատգամավոր Արեգնազ Մանուկյանի ելույթին:
«Այստեղ մի միտք հնչեց, թե իբր մենք ենք ԼՂ հակամարտության հարցը ինքնորոշման իրավունքի շուրջ պայքարից վերածել տարածքային պայքարի: Տիկի՛ն Մանուկյան, տեղեկացնում եմ, որ դա արել է Ռոբերտ Քոչարյանը, երբ Արցախի ընտրված ներկայացուցիչներին, փոխանակ ամեն գնով բանակցային սենյակում պահելու, դուրս է հրավիրել այնտեղից, այնուհետև սկսել է բանակցել ՀՀ սուվերեն տարածքների փոխանակության միջոցով ԼՂ հակամարտության մի մոդելի շուրջ:
Սերժ Սարգսյանն էլ իր հարցազրույցներից մեկում բաց տեքստով ասել է, որ Ապրիլյան պատերազմից հետո ևս մեկ զիջում է արել հանրաքվեի հարցի սահմանափակ – ոչ սահմանափակ լինելու առումով: Նա համաձայնվել է հանրաքվեի հարցը դուրս թողնել փաթեթից և ստորագրել է այլ փաստաթուղթ»,- նշեց Կարապետյանը:
Խոսելով ներկայի և ապագայի մասին՝ Մարիա Կարապետյանը նշեց. «Մենք չենք կարող ապրել անցյալով, պետք է կայացնենք ապրելու արմատական որոշում: Ապրելը հնարավոր դարձնելու համար մեզ անհրաժեշտ է երկրի ներսում շարունակել ռեֆորմները, իսկ երկրի շուրջ ապահովել կայունություն, անվտանգություն խաղաղությունը: Վերահաստատենք, որ այս հարցում կարևորագույն դերակատարում ունեն մեր Զինված ուժերը, սակայն կայունություն, սահմանների անվտանգություն և խաղաղություն ապահովելու համար կան նաև ռազմաքաղաքական և դիվանագիտական գործիքներ, այս համատեքստում մենք ունենք երկու օրակարգ: Առաջինը Հայաստանի տնտեսական և տրանսպորատային ապաշրջափակումն է… Հայաստանի և Ադրբեջանի, Հայաստանի և Թուրքիայի միջև տնտեսական և տրանսպորտային ուղիները սառեցվել են Լեռնային Ղարաբաղի հակամարտության բերումով, ոչ թե Հայաստանն է շրջափակել Թուրքիային և Ադրբեջանին, այլ հակառակը՝ Թուրքիան և Ադրբեջանն են շրջափակման ենթարկել Հայաստանը՝ իբրև թե ԼՂ հակամարտության համատեքստում թուլացնելու և զիջումներ պարտադրելու համար:
Սրանից, իհարկե, կարելի է եզրակացնել, որ ապաշրջափակումը մեզ ձեռնտու է, սա չի նշանակում, թե տարածաշրջանում տրանսպորտային և տնտեսական կապերի ապաշրջափակումը ձեռնտու չէ Ադրբեջանին, բայց Ալիևը միևնույն ժամանակ նախընտրում է տորպեդահարել այս օրակարգը և չկատարել նոյեմբերի 9-ի և հունվարի 11-ի հայտարարություններով իր ստանձնած պարտավորությունները, Ալիևը աղճատում է ապաշրջափակման օրակարգը՝ այն ներկայացնելով որպես միջանցք»:
Մարիա Կարապետյանն անդրադարձավ ևս մեկ կարևորագույն հարցի՝ սահմանազատման և սահմանագծման խնդրին՝ նշելով, որ այն ևս աղճատվում է:
Մանրամասները՝ տեսանյութում:
