Լրանում է ԱԳ նախարարի թեկնածուին ներկայացնելու վերջնաժամկետը

Օգոստոսի 2-ից՝ Նիկոլ Փաշինյանի օրենքի ուժով վարչապետի պաշտոնում վերանշանակումից հետո, սկսվեց կառավարության ձևավորման գործընթացը։ Նույն օրն ու դրան հաջորդող մյուս օրերին եղան մի շարք նշանակումներ ու վերանշանակումներ, մասնավորապես, նշանակվեցին պաշտպանության, աշխատանքի և սոցիալական հարցերի, շրջակա միջավայրի, տարածքային կառավարման և ենթակառուցվածքների, առողջապահության, արտակարգ իրավիճակների, էկոնոմիկայի, ֆինանսների, ԿԳՄՍ, արդարադատության և միայն վերջում՝ բարձր տեխնոլոգիական արդյունաբերության նախարարները։

Մինչ այս պահը թափուր է մնում միայն ԱԳ նախարարի պաշտոնը։

«Կառավարության կառուցվածքի և գործունեության մասին» օրենքի հոդված 3-ը սահմանում է․ «Կառավարությունը կազմավորվում է վարչապետ նշանակվելուց հետո` տասնհինգօրյա ժամկետում: Իր նշանակումից հետո վարչապետը հնգօրյա ժամկետում հանրապետության նախագահին է ներկայացնում փոխվարչապետների և նախարարների թեկնածու նշանակելու մասին գրավոր առաջարկություն, որը ներառում է համապատասխան թեկնածուի ազգանունը, անունը, հայրանունը և համապատասխան պաշտոնը, որում առաջարկվում է նշանակել նրան»:

Նախագահի աշխատակազմից Factor.am-ին հայտնեցին, որ նախագահը վարչապետից դեռևս առաջարկ չի ստացել ԱԳ նախարար նշանակելու վերաբերյալ։

Իրավապաշտպան Ռուբեն Մելիքյանը Factor.am-ի հետ զրույցում, հղում անելով «Կառավարության կառուցվածքի և գործունեության մասին» օրենքին, նշեց․ «Եթե հաշվի առնենք, որ վարչապետը նշանակվել է երկուշաբթի, ուրեմն նախարարի թեկնածուին նշանակելու մասին գրավոր առաջարկություն ներկայացնելու ժամկետը լրանում է շաբաթ»,- ասաց Մելիքյանը։

«Թրանսփարենսի Ինթերնեշնլ» հակակոռուպցիոն կենտրոնի իրավական հարցերով փորձագետ Հայկ Մարտիրոսյանը, սակայն, նշում է, որ նախագահին ԱԳ նախարար նշանակելու մասին գրավոր առաջարկություն ներկայացնելու վերջնաժամկետը լրանում է այսօր:

«Քանի որ վարչապետի կողմից նախարարի թեկնածու պետք է առաջադրվի 5-օրյա ժամկետում, ապա պետք է հաշվենք նշանակման օրը ներառյալ։ Այսօր լրանում է այդ ժամկետը, և վարչապետը պարտավոր է նախարարի թեկնածուին կամ թեկնածուներին ներկայացնել նախագահի հաստատմանը։ Չներկայացնելը սահմանադրական նորմի խախտում է, իսկ 15-օրյա ժամկետում կառավարությունն ամբողջությամբ պետք է ձևավորված լինի»,- նկատեց Մարտիրոսյանը։

Հիշեցնենք, որ ԱԳ նախարարի պարտականություններն այս պահին կատարում է ՀՀ Անվտանգության խորհրդի նախկին քարտուղար Արմեն Գրիգորյանը, որը նշանակվել էր ԱԳ նախարարի առաջին տեղակալ։ Երկու օր առաջ էլ Գրիգորյանի հրամանով ԱԳՆ մամուլի քարտուղար էր նշանակվել նախկին փոխվարչապետ Տիգրան Ավինյանի խորհրդական Վահան Հունանյանը։

Արփի Հակոբյան