ՊՆ-ն առաջարկում է Զինված ուժերի Գլխավոր շտաբի կառուցվածքում ավելացնել նոր ստորաբաժանում

Պաշտպանության նախարարությունն առաջարկում է Զինված ուժերի Գլխավոր շտաբի կառուցվածքում ավելացնել տարածքային պաշտպանության և պահեստային ուժերի հրամանատարություն կառուցվածքային ստորաբաժանում:

Այս մասին օգոստոսի 4-ին նախագիծ է ներկայացվել Իրավական ակտերի նախագծերի քննարկման միասնական e-draft համակարգում։

Օրինագծով նախատեսվում է գլխավոր շտաբի կազմում ունենալ հրամանատարությունների օղակ՝ տարածքային պաշտպանության և պահեստային ուժերի՝ զորատեսակների կենտրոնացված ղեկավարման նպատակով, որը կիրականացնի տարածքային պաշտպանության կազմակերպման պլանավորումը, ինչպես նաև պետական ռազմական համակարգի մարմինների հետ համագործակցությունը, կցագրված պահեստազորային ռեսուրսների կառավարման, աշխարհազորային ստորաբաժանումների պատրաստության և ներդաշնակման կազմակերպման հարցերի համակարգման գործընթացը։

Ըստ ներկայացված օրինակի՝ որոշման նախագծի ընդունման կապակցությամբ 2021 թվականի և հետագա տարիների պետական բյուջեներում լրացուցիչ ֆինանսական միջոցների անհրաժեշտություն և պետական բյուջեի եկամուտներում ու ծախսերում փոփոխություններ չի նախատեսվում: Նոր կառուցվածքային ստորաբաժանման ստեղծման կապակցությամբ ՀՀ ԶՈՒ թվակազմի ավելացում չի պլանավորվել։ Նախագիծը իրականացվելու է այլ ստորաբաժանումների հաստիքների կրճատման և ՀՀ պաշտպանության նախարարությանը հատկացված բյուջետային միջոցների հաշվին:

Փաստաթղթի նախագիծն այս պահին որևէ «Կողմ» կամ «Դեմ» ձայն չունի։ Այն շրջանառության մեջ կմնա մինչև օգոստոսի 20-ը ներառյալ։

Ռոզա Վարդանյան