16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
ԱՄՆ-ը Լիբանանին ևս 100 միլիոն դոլար է խոստանում
Քաղաքականություն
05.08.2021 | 23:05
ԱՄՆ-ի նախագահը հավելյալ 100 միլիոն դոլար գումար է խոստանում մարդասիրական նպատակներով հատկացնել Լիբանանին: Երկրի մայրաքաղաքում չորեքշաբթի օրը նշում էին նավահանգստում տեղի ունեցած աղետաբեր պայթյունի մեկ տարին: Երկիր, որը համավարակի ու այս հսկա պայթյունի հետեւանքով հայտնվել է տնտեսական մեծ խնդիրների մեջ: Այս մասին գրում է «Ամերիկայի ձայն»-ը։
Նախագահ Ջո Բայդենը նաեւ շնորհակալություն է հայտնել Ֆրանսիայի իր պաշտոնակից Էմանուել Մակրոնին` ի աջակցություն Լիբանանի, միջազգային դոնորների վեհաժողով սկսելու ջանքերի համար: Մակրոնը քննադատել է Լիբանանի ձախողված քաղաքական դասին այդ երկրի տնտեսական խառնաշփոթի համար: Այս խոսքերով նա հանդես է եկել վեհաժողովի բացման ժամանակ, որն արդեն հանգանակել է ավելի քան 370 միլիոն դոլար:
Երկրի մայրաքաղաքն ամբողջությամբ ցնցած պայթյունից անցել է մեկ տարի, սակայն քաղաքական վերնախավին դեռեւս չի հաջողվել կազմել երկիրը վերակառուցելու ունակ կառավարություն, չնայած Ֆրանսիայի եւ միջազգային համայնքի կողմից առկա ճնշումներին:
Ֆրանսիան, որպես Լիբանանի նախկին գաղութատեր պետություն, ղեկավարում է այս երկիրը ճգնաժամից դուրս բերելու միջազգային ջանքերը: Պայթյունից հետո Մակրոնը երկու անգամ այցելել է Բեյրութ, ապահովել արտակարգ իրավիճակի համար հատկացումներ եւ ճամփորդության արգելք հաստատել Լիբանանի պաշտոնատար մի քանի անձանց նկատմամբ, տնտեսական բարեփոխումների փաթեթ պահանջելու իր ջանքերի շրջանակում:
