19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
«Թալիբան»-ը շարունակում է ավերիչ արշավն Աֆղանստանում
Քաղաքականություն
05.08.2021 | 22:13
Աֆղանստանում Թալիբանի և երկրի կառավարական ուժերի միջև շարունակվող մարտերի արդյունքում նկատելիորեն մեծացել է փախստականների թիվը: Այս մասին հայտնում է «Ամերիկայի ձայն»-ը։
Նրանց մի մասը հասել է Թուրքիայի տարածքում գտվնող Վանի գավառ, քսան օր շարունակ ամառային տապին քայլելով:
«Մենք գիշերներն անցկացնում էինք լեռներում, իսկ օրվա ընթացքում քայլում էինք արեւի տակ առանց սննդի ու ջրի», պատմում են նրանք` հիշելով գիշերային ցուրտն ու ցերեկային անտանելի շոգը:
Վանի պաշտոնատար անձինք ասում են, թե գրանցել են ավելի քան 34 հազար փախստական: Անօրինական եղանակով մուտք գործածներին սահմանապահ ուժերը հետ են ուղարկում:
Թուրքիայի սահմանն անցնելուց հետո ոստիկանությունը պետք է նրանց գրանցի` բոլոր տվյալները, այդ թվում մատնահետքերը վերցնելուց հետո: Սակայն լինում են դեպքեր, երբ մարդկանց Պակիստանի տարածքով անօրինական եղանակով փորձում են անցկացնել Իրան կամ Թուրքիա, որոնց բոլորի նպատակն այստեղից հետո Եվրոպա մեկնելն է:
Մարդիկ պատմում են իրենց անցած անապատների, այնտեղ վխտացող վայրի շների ու նրանց կողմից հետապնդման ենթարկվելու մասին:
Եվ ստացվել է այնպես, որ աշխարհում ապաստան որոնող մարդկանց երեք միլիոնն աֆղանստանցիներ են:
Միգրացիայի հարցերով միջազգային կազմակերպությունը տեղեկացնում է, որ սահմաններն անօրինական եղանակով անցող աֆղանստանցիների թիվը մայիս ամսից աճել է 30-40 տոկոսով:
Նրանք պատմում են, թե ինչպես են թալիբներն իրենց գյուղերը մուտք գործելուց հետո, այրում տները, ֆերմաները, գոմերը դաշտներն ու այգիները:
Փախստականների թիվը ցույց է տալիս շարունակ աճելու միտում, քանի որ մոտենում է այն օրը, երբ այստեղից լիովին դուրսբերված կլինեն ամերիկյան ուժերը: Դա օգոստոսի 31-ն է:
Ու դեռ պարզ չէ, թե ամերիկյան ուժերի դուրսբերումից հետո ծայրահեղական Թալիբանը երկրի կառավարության հետ կգա խաղաղություն հաստատելու համաձայնության, թե կշարունակի ավերիչ իր արշավը, ինչպես ավերում է այսօր:
