Իշխանությունը եկել է ապացուցելու՝ ընդդիմությունը չի կարողանում իր թեկնածուի օգտին քվեարկել․ Նազարյան. ՏԵՍԱՆՅՈՒԹ

«Այս իրավիճակում՝ երկիրը իրենց ձեռքով քանդելուց, ավերելուց հետո իշխանական մեծամասնությունը եկել է այստեղ, պրիմիտիվ խաղերով ուզում է ապացուցել, որ ընդդիմությունն այնքան անմիասնական է, որ չի կարողանում քվեարկել իր իսկ թեկնածուի օգտին»,- այս մասին Աժ իր ելույթում ասաց «Հայաստան» խմբակցության պատգամավոր Գեղամ Նազարյանը՝ ընդգծելով, որ եթե իշխանությունը քաղաքական որոշում ունենար կողմ քվեարկելու, կքվեարկեր:

«Եռաբլուրում շարունակվում են հուղարկավորությունները, իսկ դուք այստեղ նման խաղով խաբում եք հանրությանը, թե դուք լավն եք, իսկ ընդդիմությունը՝ վատը։ Ժողովրդի հաշվին մի՛ արեք նման բան։ Ժողովրդի փողի հաշվին մի՛ ասեք, թե մենք մեկ բացակա պատգամավոր ունենք։ Ճիշտ է, որ ստերով խաբել եք մարդկանց ու ձայներ ստացել, բայց ժողովուրդն իմաստուն է։ Խաբեցիք, թե երեսուն տարի առաջ Արցախն արդեն վաճառել են ու խեղճ հարիֆի ջեբը պատերազմ գցել… Նույն եղանակով էլ այստեղ եք շարունակում։ Չի անցնելու։

Ուզո՞ւմ եք ընտրել՝ ընտրեք, չէ, ուրեմն՝ չէ։ Կա՛մ քվեարկեք, կա՛մ պարզ ասեք, որ համաձայն չեք Իշխան Սաղաթելյանի թեկնածությանը։ Եթե նման «պրիմիտիվ» խաղեր եք այստեղ խաղում, բա կառավարությունո՞ւմ ինչեր եք անելու…

Բա Սյունիքի բարձունքները ո՞նց եք պաշտպանելու, բա Արցախի խնդի՞րը ոնց եք լուծելու։ Մանկապարտեզային խաղերո՞վ եք տնտեսություն վերականգնելու։ Այն տղաները, որ սահմանին զոհվում էին, մեծապես թքած ունեին, թե մենք ինչ քաղաքական հայացքներ ունենք, նրանք հայրենիքն իրենց  կյանքով էին պաշտպանում և ոչ նրա համար, որ մենք այսօր այստեղ տունտունիկ խաղանք»,- նշեց Նազարյանը:

Մանրամասները՝ տեսանյութում: