15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
Թուրքիայի նախագահականի պաշտոնյան կոչ է արել վերջ դնել սոցցանցերում «Օգնի՛ր Թուրքիային» արշավին. «Դրա նպատակն է, որ մեր երկիրն անկարող երևա»
Քաղաքականություն
02.08.2021 | 22:55
Թուրքիայում շարունակվող անտառային հրդեհների հետ կապված սոցիալական ցանցերում սկսվել է #HelpTurkey և #GlobalCall հեշթեգնեով ակցիա, որի միջոցով թուրք օգտատերերն օգնություն են խնդրում։ Այս արշավին արձագանքել է Թուրքիայի նախագահի աշխատակազմի հանրային կապերի վարչության պետ Ֆահրեթթին Ալթունը՝ նշելով՝ «այս օգնության արշավը սկսվել է, որ մեր պետությունը ներկայացվի որպես անգործունակ»։ Այս մասին գրում է Bianet-ը։
Հրդեհաշիջման ոչ բավարար աշխատանքի, ինքնաթիռների պակասի և դրսից եկող օգնության առաջարկները մերժելու հետ կապված քննադատությունների ֆոնին սոցիալական ցանցերում հրապարակումները տարածվում են #helpturkey հեշթեգով, ինչն էլ, ըստ երևույթին, դուր չի գալիս Թուրքիայի իշխանություններին։
Հայտարարություն տարածելով նախօրեին սկսված արշավի մասին, որը 2․5 մլն թվիթ ունի, Ալթունն ասել է․ «Ցանկացած բարի կամքով օգնություն և ներդրում անհրաժեշտ է մեր ազգային միասնության համար։ Այս, այսպես ասած, օգնության արշավը կազմակերպվել է դրսից և միասնական կենտրոնից՝ գաղափարական դրդապատճառներով, որի նպատակն է, որ մեր երկիրը երևա անկարող ու խարխլվի պետություն-ազգ միասնությունը»։
Բացի այդ, նա պնդել է, թե սոցիալական մեդիայում, խմբերում ու ֆորումներում տարածվող տեղեկատվության մեծ մասը կեղծ լուրեր են։
«Ինչպես մեր նախագահն ասել է՝ մենք կփոխհատուցենք մեր բոլոր կորուստները, բացառությամբ կյանքերի կորուստների, և մենք կմարենք այս կրակը, որը մեզ ներսից ոչնչացնում է»,- ասել է Ալթունը։
Թուրք պաշտոնյանի այս հայտարարությունից հետո սոցիալական ցանցերում բացվել է հակահեշթեգը՝ #WeDontNeedHelp-ը (Մենք օգնության կարիք չունենք)։
Էմմա Չոբանյան
