ԱԺ-ն ընդդեմ Նիկոլ Փաշինյանի. մամուլն ազա՞տ չէ, քան երբևէ. ՏԵՍԱՆՅՈՒԹ

Հայաստանի 8-րդ գումարման խորհրդարանն իր աշխատանքները մեկնարկեց լրագրողների համար աննախադեպ սահմանափակումներով:

Խորհրդարանի ամբողջ շենքում ԱԱԾ պետական պահպանության աշխատակիցներ են՝ քաղաքացիական և ծառայողական հագուստներով, որոնք միջանցքներում անցակետեր են ձևավորել, որ լրագրողների տեղաշարժն ավելի հեշտ սահմանափակեն: Իսկ թե ով է հատուկ ծառայության աշխատակիցներին հրահանգավորել, իշխանական պատգամավորները պատասխաններ չունեն:

Ազգային ժողովի աշխատակազմի ղեկավարի պարտականությունները կատարող Աննա Գրիգորյանը կտրականապես հրաժարվում է որևէ մեկնաբանություն տալ լրագրողների տեղաշարժի սահմանափակումների վերաբերյալ: Սակայն նա մշտապես քննարկումների մեջ է ՊՊԾ աշխատակիցների հետ:

«Պատիվ ունեմ» խմբակցության պատգամավոր Թագուհի Թովմասյանը մի քանի օր առաջ էր հարցում արել ԱԺ աշխատակազմին և այսօր պատասխան ստացել, որ կառույցում լրագրողների համար սահմանափակումներ չկան: Թե ինչու են իրականությունն ու կառույցի գլխավոր քարտուղարության պատասխանը միմյանց հակասում, իշխանական պատգամավոր, նախկին լրագրող Սիսակ Գաբրիելյանն ասում է՝ ինքը կբարկանար, եթե Սերժ Սարգսյանի իշխանության օրոք իր տեղաշարժը սահմանափակվեր:

Ինֆորմացիայի ազատության կենտրոնի նախագահ Շուշան Դոյդոյանը մատնանշում է ԱԺ աշխատակազմի անօրինական գործողությունները: Փորձագետը նշում է ՝ օրենսդրական կարգավորումը չկա, բայց սահմանափակումներն արդեն ուժի մեջ են մտել:

Երևանի մամուլի ակումբի նախագահ Բորիս Նավասարդյանն էլ նկատում է՝ այս սահմանափակումները նշանակում են, որ խորհրդարանի և քաղաքական մեծամասնության հաշվետվողականությունը հանրության առջև լինելու է շատ ավելի ցածր մակարդակի վրա: Նավասարդյանի խոսքով՝ ԱԺ նորընտիր նախագահ Ալեն Սիմոնյանի՝ ԱԺ-ում մամուլի կետեր ստեղծելու գաղափարն արդյունավետ չէ:

Այսպիսով՝ հեղափոխությունից անմիջապես հետո Ազգային ժողովի դարպասները բացած հեղափոխական իշխանությունը կարճ ժամանակ անց ոչ միայն փակեց այդ դարպասները քաղաքացիների առաջ, այլև այսօր արդեն ոստիկանական ուժեղացված հսկողություն է սահմանում անգամ պատգամավորների և լրագրողների տեղաշարժի նկատմամբ։

Մանրամասները՝ տեսանյութում։

Նարեկ Կիրակոսյան