Քաղաքականություն
02.08.2021 | 15:22
Թուրքիան արդեն 6-րդ օրն է՝ պայքարում է անտառային հրդեհների դեմ։ Թուրքիայի իշխանությունները, որոնք չէին ընդունում տարբեր երկրներից առաջարկվող օգնությունը, փոխել են որոշումը։ Եվրոպական Միությունը հայտարարել է, որ ջրատար ինքնաթիռներ է ուղարկում՝ Թուրքիային օգնելու մարել կրակը։ Մինչ այդ, զոհվածների թիվը հասել է 8-ի, գրում է Duvar-ը։
«Եվրահանձնաժողովն արդեն մոբիլիազացրել է Խորվաթիայից մեկ Canadair ինքնաթիռ, ևս երկուսն էլ՝ Իսպանիայից։ Հրդեհաշիջման աշխատանքներում օգտագործվող այս ինքնաթիռները Եվրոպական քաղաքացիական պաշտպանության ռեզերվի մասն են»,- ասվում է հայտարարության մեջ։
Թուրքիայի նախագահի աշխատակազմի հանրային կապերի բաժնի պետ Ֆահրեթթին Ալթունն էլ տեղեկացրել է, որ 129 հրդեհի օջախից 122-ը վերահսկողության տակ է առել։
«35 նահանգում 129 հրդեհներից 122-ը մեկուսացվել է»,- գրել է Ալթունը թվիթերյան իր էջում։
Նշվում է նաև, որ Թուրքիայի հարավում բռնկված անտառային հրդեհների հետևանքով զոհերի թիվը հասել է 8-ի։ Հուլիսի 28-ից հազարավոր մարդիկ տարհանվել են իրենց տներից։ Թուրքիայի իշխանություններն ավելի վաղ հայտնել էին, որ երկիրը չունի գեթ մեկ հրդեհաշիջման ինքնաթիռ։
Տեղացի հրշեջներին օգնության են շտապել խմբեր Ռուսաստանից, Ուկրաինայից, Ադրբեջանից ու Իրանից։ Թուրքիայի կառավարությունն իր հերթին պարտավորվել է վերականգնել վնասված տներն ու փոխհատուցել հրդեհի հետևանքով կրած վնասները։
Էմմա Չոբանյան
