19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ադրբեջանը նախատեսում է հայկական Շուշիի բնակչության թիվը հասցնել 25․000-ի
Քաղաքականություն
30.07.2021 | 22:13
Ադրբեջանը ծրագրում է մինչև 2040 թվականն ադրբեջանական օկուպացիայի տակ գտնվող հայկական Շուշի քաղաքի բնակչությունը հասցնել 25․000-ի։ Այս մասին հաղորդում են ադրբեջանական լրատվամիջոցները՝ վկայակոչելով հայկական քաղաքի տարածքային պլանավորման ծրագիրը։
Նշվում է, որ Շուշիում նախատեսվում է 750․000 քառակուսի մետր բնակարանային ֆոնդ ստեղծել։ Նախադպրոցական հաստատությունները նախատեսված են լինելու 2․250 մարդու համար, ընդհանուր և միջին ուսումնական հաստատությունները՝ 4․500, պոլիկլինիկան՝ 750, իսկ հիվանդանոցը՝ 86 մարդու համար։ Միաժամանակ, հիշեցնենք, որ Ադրբեջանը Շուշին վերածել է պետական արգելոցի․ Իլհամ Ալիևը ստորագրել է «Ադրբեջանի մշակութային մայրաքաղաք Շուշիի մասին» օրենքը։
Պաշտոնական Բաքուն ամեն ինչ անում է՝ քաղաքը հայկական հոգևոր, պատմամշակութային ժառանգությունից ու դիմագծից զրկելու համար, հիմա էլ որոշել է փոխել ժողովրդագրական պատկերը։
Հարկ է նկատել, որ նույնիսկ Խորհրդային միության տարիներին Շուշիում 25․000 մարդ չի ապրել։ 1979 թվականի տվյալներով՝ Շուշիում ապրել է 10․784 բնակիչ։
Ակնհայտ է, որ Բաքուն ամեն ինչ անում և անելու է՝ Շուշի հայերի վերադարձին խոչընդոտելու համար։ 2020 թվականի նոյեմբերի 9-ի եռակողմ հայտարարությունը նախատեսում է փախստականների վերադարձ, այդ թվում՝ Շուշիի հայ բնակչության, սակայն այդ ուղղությամբ գործնական տեսանելի քայլեր չկան։
Հայկական մշակութային կոթողները դիմագծից զրկելուց զատ՝ ադրբեջական իշխանությունները ոչնչացնում են նաև Շուշիի հայ բնակիչներին պատկանող տները։ Մասնավորապես, համացանցում կան բազմաթիվ լուսանկարներ և տեսանյութեր, թե ինչպես են ադրբեջանցիները քանդում հայերի բնակելի շենքերն ու տները։
Հավելենք, որ չնայած Ադրբեջանի իշխանությունների՝ հայկական Շուշիի հետ կապված մեծ պլաններին՝ որպես այդպիսին, ադրբեջանցի բնակչության վերադարձի գործնական քայլեր դեռ չկան։
Էմմա Չոբանյան
