17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Զոհեր պատերազմից հետո. վեց ամսվա ընթացքում խաղաղ պայմաններում 29 զինծառայող է մահացել․ ՏԵՍԱՆՅՈՒԹ
Քաղաքականություն
30.07.2021 | 21:45
Հայկական զինված ուժերում ոչ մարտական գործողությունների հետևանքով մահացությունների բարձր ցուցանիշը շարունակում է պահպանվել:
2021 թվականի հունվար-հունիս ամիսներին Հայաստանում և Արցախում գրանցվել է 29 զինծառայողի մահվան դեպք, որից միայն երեքն է թշնամու կրակոցից: Այս տեղեկությունը հավաքագրել է Հելսինկյան քաղաքացիական ասամբելայի Վանաձորի գրասենյակը՝ մանրամասնելով, որ մահվան դեպքերից 9-ը ավտովթարի, 8-ը՝ առողջական խնդիրների, 4-ը՝ դժբախտ պատահարի, ևս 4-ը՝ ինքնասպանության, իսկ 1-ը՝ սպանության հետևանքով են եղել:
Նշենք, որ հրադադարի ռեժիմի խախտման հետևանքով մահացած 3 զինծառայողներից 2-ը, ըստ ՀՔԱՎ-ի, վիրավորում էին ստացել 44-օրյա պատերազմի ընթացքում՝ 2020 թվականի հոկտեմբեր և նոյեմբեր ամիսներին, և մահացել 2021 թվականին։
Իրավապաշտպան Ժաննա Ալեքսանյանը նշում է՝ պաշտոնական տեղեկությունները, թե այս կամ այն զինծառայողն ինքնասպանություն է գործել, հաճախ այնքան էլ իրականությանը չեն համապատասխանում: Ըստ իրավապաշտպանի՝ սպանությունները երբեմն որակվում են ինքնասպանություն: 2021 թվականի մահվան դեպքերի մեծ մասը բաժին է ընկնում մայիսին: Մահացած 29 զինծառայողներից 16-ը պայմանագրային ժամկետային զինծառայողներ են, 7-ը՝ պարտադիր ժամկետային, 2-ը՝ պահեստազորային, 3-ը՝ սպա, իսկ 1-ը՝ ենթասպա։
Ժաննա Ալեքսանյանն ասում է՝ անգամ 44-օրյա պատերազմից հետո զինվորը պետության ղեկավարության կողմից որպես մարդ և որպես հայրենիքի պաշտպան չի արժևորվում:
ՀՔԱՎ Խաղաղաշինական ծրագրերի համակարգող Արմինե Սադիկյանն առաջնային լուծում պահանջող խնդիրներից մեկն էլ համարում է այն, որ բանակում շարունակում են ծառայել պատերազմին մասնակցած զինվորները, որոնք մարտական գործողությունների ընթացքում հոգեբանական խնդիրներ են ձեռք բերել: Պաշտպանական գերատեսչությունը միշտ չէ, որ հանրությանը տեղեկացնում է ոչ մարտական պայմաններում գրանցված մահվան դեպքերի մասին:
ՀՔԱՎ-ը պարզել է, որ 2021 թվականին մահացած 29 զինծայողներից միայն 12-ի մահվան մասին է տարածվել պաշտոնական հաղորդագրություն, մյուս 17 դեպքերից 1 դեպքի մասին տեղեկություն է տարածվել միայն լրատվամիջոցներով, իսկ 16 դեպքի մասին ընդհանրապես հաղորդագրություն չի տարածվել:
Նշենք, որ պատերազմից հետո նաև զինծառայողների անհետ կորելու 3 դեպք է գրանցվել: Ժամկետային զինծառայող Նորիկ Մկրտչյանը մայիսի 18-ին ինքնակամ լքել էր Վարդենիսի զորամասը։ Նրան գտնելու մասին տեղեկություն դեռևս չկա։ Իսկ հուլիսի 14-ին Սյունիքի Սև լճի հատվածում կորել էր կապը զինծառայողներ Արթուր Նալբանդյանի և Արամայիս Տոռոզյանի հետ։ Մինչ օրս նրանք չեն հայտնաբերվել, ՊՆ-ն չի բացառել նրանց գերեվարումը ադրբեջանցիների կողմից։ Զինծառայողները եղել են առանց զենքի։
Մանրամասները՝ տեսանյութում։
Նարեկ Կիրակոսյան
