24.04.2026 | 12:03
Ո՛չ ուրացումը, ո՛չ էլ թշնամանքը չեն կարող բուժել վերքերը. Պոլսո Հայոց պատրիարքն ուղերձ է հղել
Կա՛մ անվճար պատվաստում, կա՛մ վճարովի թեստ․ ուսուցիչները՝ երկընտրանքի առաջ․ ՏԵՍԱՆՅՈՒԹ
31.07.2021 | 19:00
Նոր ուսումնական տարում դասապրոցեսն առկա ձևաչափով և առանց դասարանների բաժանման կազմակերպելու համար ուսումնական հաստատությունների աշխատակիցների շրջանում կորոնավիրուսի դեմ պատվաստման մակարդակը պետք է լինի առնվազն 60-70%: Այս եզրահանգմանն են եկել ԿԳՄՍ և առողջապահության նախարարի պաշտոնակատարները համաճարակային իրավիճակը քննարկելու և նոր ուսումնական տարում դասապրոցեսի կազմակերպման հնարավոր տարբերակները նախորոշելու նպատակով օրերս կայացած հանդիպման ժամանակ։
ԿԳՄՍՆ Հանրակրթության վարչության պետ Արսեն Բաղդասարյանը տեղեկացնում է՝ շրջաբերականով դիմել են հանրապետության դպրոցներին՝ հորդորելով պատվաստված ուսուցիչների բարձր տոկոս ապահովել։
Հարցին՝ արդյո՞ք պետությունը կհոգա ուսուցիչների թեստավորման ծախսերը, նախարարության ներկայացուցիչը պատասխանեց, որ նման ծրագիր չկա, ուստի ուսուցիչների համար նաև ֆինանսական տեսանկյունից ձեռնտու կլինի պատվաստվելը։ Նրա խոսքով՝ ուսուցիչներին պատվաստվել հորդորելու հարցում որոշիչ դեր ունեն դպրոցների տնօրենները։
Երևանի թիվ 54 դպրոցի տնօրեն Մարտին Վարդանյանը փաստում է՝ ուսուցիչների մեծ մասը պատրաստակամ է պատվաստվելու հարցում։ Երևանի թիվ 46 դպրոցի տնօրեն Արմեն Աբգարյանն էլ իր հերթին է վկայում՝ որոշ ուսուցիչների հապաղումը պայմանավորված է պատվաստանյութի ցանկալի տեսակին սպասելու հանգամանքով միայն։
Նույն դպրոցի ուսուցչուհիներ Վարդուհի Ղարիբյանն ու Մարիամ Առաքելյանն ընդգծում են՝ նախընտրելի է պատվաստվելը, քան թեստավորվելը, քանի որ ՊՇՌ հետազոտության արդյունքը մի քանի օր անց կարող է փոխվել։
Իսկ ահա Երևանի թիվ 12 հիմնական դպրոցի ուսուցչուհի Արփենիկ Հովակիմյանն ասում է՝ ուսուցիչների զգալի մասը պատվաստվելու հարցում անորոշության մեջ է։ Նա նկատում է՝ ուսուցիչներին փաստի առաջ են կանգնեցնում․ թեստի համար վճարելու ունակ չեն լինի, ուստի ստիպված կլինեն պատվաստվել՝ անգամ կամքին հակառակ։
Մանրամասները՝ տեսանյութում։
Աննա Բաբաջանյան
