Նման եմ մարդու, ով վախենո՞ւմ է լրագրողներից. Ալեն Սիմոնյանը՝ լրագրողների համար առանձին գոտի ստեղծելու մասին. ՏԵՍԱՆՅՈՒԹ

Անվտանգության առումով որոշում է կայացվել բարձրացնել անվտանգության աստիճանը. սա միակ որոշումը չէ, էլի կլինեն որոշումներ, փոփոխություններ, որոնք միտված կլինեն ԱԺ շենքն ավելի անվտանգ դարձնելուն: Այս մասին, այսօր՝ հուլիսի 30-ին, ԱԺ-ում լրագրողների հետ զրույցում նշեց ԱԺ փոխխոսնակ Ալեն Սիմոնյանը՝ անդրադառնալով նրան, որ ԱԺ դահլիճ մտնող բոլոր մուտքերի մոտ անվտնգության սարքավորումների տեղադրմանը:

Ինչ վերաբերում է ԱԺ-ում լրագրողների աշխատանքը սահմանափակելուն, նրանց համար առանձին գոտի ստեղծելուն, որի հետևանքով փաստորեն պատգամավորների հետ լրագրողների շփումները նվազելու են, նա նշեց. «Բոլոր փոփոխությունների մասին կիմանաք շուտով: Օգոստոսի 2-ին աշխատելու եք այնպես, ինչպես աշխատել եք մինչ օրս»:

Հարցին, թե վախենո՞ւմ են լրագրողներից, ԱԺ փոխխոսնակն արձագանքեց. «Ես նման եմ մի մարդու, ով վախենում է լրագրողների՞ց: Կատարվող անվտանգային միջոցառումների պատճառներն անվտանգային են: Խոսքը կոնկրետ լրագրողների մասին չէ, կոնկրետ անձանց մասին չէ: Գործելու են նոր կանոններ, որոնց նպատակն անվտանգությունն է»:

Սիմոնյանը հիշերեց, որ բազմաթիվ վատ նախադեպեր են եղել մեր պատմության մեջ. «Բավականին վերջերս և անցյալում այդ նախադեպերը շատ են: Սկսած Հոկտեմբերի 27-ից, ի դեպ, որի կազմակերպիչներից և իրագործողներից մեկը լրագրող է եղել, վերջացրած պատերազմով: Դուք ականատես եղաք ԱԺ-ի դիմացի փողոցում գնդակահարության տեսարանների: Եղավ մահափորձ ԱԺ նախագահի դեմ: Այս ամենը դուք չեք հիշատակում և զարմանում եք, որ անվտանգության կանոնները կարող են ավելի խստանալ այն պարագայում, երբ ամեն օր ունենում ենք սահմանային միջադեպեր»:

Սիմոնյանն ընդգծեց, որ լրագրողներն ունենալու են իրենց բոլոր հնարավորությունները՝ օրենքով սահմանված, որոնք նախկինում ունեցել են: