02.05.2024 | 21:14
Նախկին կուսակցական լինելը չի նշանակում պոտենցիալ հանցագործ լինել․ Վահագն Հովակիմյան․ ՏԵՍԱՆՅՈՒԹ
Բաքվում դատախազը պահանջել է հայ գերիներ Լյուդվիգ Մկրտչյանին և Ալյոշա Խոսրովյանին 20 տարվա ազատազրկման դատապարտել
Քաղաքականություն
28.07.2021 | 18:44
Այսօր Բաքվի Յասամալի շրջանային դատարանում շարունակվում է հայ ռազմագերիներ Լյուդվիգ Մկրտչյանի և Ալյոշա Խոսրովյանի նկատմամբ հարուցված շինծու քրեական գործով դատավարությունը։ Ադրբեջանը հայ գերիներին մեղադրում է Արցախյան առաջին պատերազմում ադրբեջանցի գերիներին խոշտանգելու և այլ հանցագործություններ կատարելու մեջ։
Տեղական լրատվամիջոցների հաղորդմամբ՝ նիստն ընթանում է դատավոր Էլբեյ Ալլահվերդիևի նախագահությամբ։
Վկաների ելույթներից հետո այսօրվա նիստում ելույթ է ունեցել նաև մեղադրող դատախազը, որը պահանջել է հայ գերիներից յուրաքանչյուրին դատապարտել 20 տարվա ազատազրկման։ 10 տարի նրանք անցկացնելու են բանտում, ևս 10 տարի՝ խիստ ռեժիմի գաղութում։
Լյուդվիգ Մկրտչյանը Ադրբեջանի կողմից գերեվարվել է 2020թ․ հոկտեմբերի 20-ին Ֆիզուլիի շրջանում, իսկ Ալյոշա Խոսրովյանը՝ 2020թ․ հոկտեմբերի 3-ին։
Հավելենք, որ Լյուդվիգ Մկրտչյանի ու Ալյոշա Խոսրովյանի շինծու քրեական գործով դատական առաջին նիստը տեղի է ունեցել հունիսի 2-ին։
Պաշտոնական Բաքուն, հիշեցնենք, Ադրբեջանում պահվող հայ ռազմագերիների նկատմամբ հարուցել է շինծու քրեական գործեր, շարունակում է նրանց ապօրինաբար պահել ու հրաժարվում է վերադարձնել Հայաստանին։ Հայ գերիներից շատերն արդեն ապօրինի դատապարտվել են։
Էմմա Չոբանյան
