19.11.2024 | 10:29
Նավթի գներն աճել են
Նախագահ Արմեն Սարգսյանն այցելել է Տոկիոյում գտնվող՝ Ֆիզիկայի և մաթեմատիկայի Կավլի ինստիտուտ. ՏԵՍԱՆՅՈՒԹ
Տեսանյութեր
28.07.2021 | 12:17
Աշխատանքային այցով Ճապոնիա մեկնած Հայաստանի Հանրապետության նախագահ Արմեն Սարգսյանն այցելել է Տոկիոյում գտնվող՝ Ֆիզիկայի և մաթեմատիկայի Կավլի ինստիտուտ (Kavli IPMU):
2007 թվականին հիմնադրված հաստատությունը ֆիզիկամաթեմատիկական ոլորտում հիմնարար հետազոտությունների իրականացման կենտրոն է: Ինստիտուտը ներկայումս համարվում է ամենագրավիչ հետազոտական կենտրոններից մեկը աստղաֆիզիկայի, տարրական մասնիկների ֆիզիկայի և մաթեմատիկայի ոլորտներում աշխարհի առաջատար հետազոտողների համար:
Նախագահ Սարգսյանը շրջել է գիտահետազոտական կենտրոնի տարածքում, ծանոթացել ինստիտուտի գործունեությանն ու ծրագրերին, հանդիպել ինստիտուտի ղեկավար կազմի հետ:
Ինստիտուտի տնօրեն Հիրոսի Օգուրին նախագահ Սարգսյանին ներկայացրել է իրենց գործունեության հիմնական ուղղություններն ու իրականացվող հետազոտական ծրագրերը:
Քննարկվել են Կավլի ինստիտուտի և Երևանի պետական համալսարանի ու ՀՀ ԳԱԱ Բյուրականի աստղադիտարանի միջև փոխգործակցության հնարավորությունները:
Նախագահ Սարգսյանը ինստիտուտի ներկայացուցիչներին հրավիրել է մասնակցելու գալիք տարի Հայաստանում նախատեսվող Գիտության ու արվեստի միջազգային STARMUS 6-րդ փառատոնին:
Նախագահ Սարգսյանը հանդիպել և զրուցել է նաև ինստիտուտում հետազոտական աշխատանքներ իրականացնող երիտասարդ հայ մասնագետների հետ:
