Տեղ համայնքի բնակիչները խմելու ջուրն օգտագործում են ոռոգման նպատակով․ «Վեոլիա Ջուր»

Ինչպես արդեն տեղեկացրել ենք, Սյունիքի մարզի Տեղ համայնքի բնակիչներն ահազանգել էին, որ համայնքում խմելու ջրի մատակարարման հետ կապված լուրջ խնդիրներ կան հատկապես ամռանը։

Factor.am-ը տեղեկացրել էր, որ փորձել է պարզաբանում ստանալ «Վեոլիա Ջուր» փակ բաժնետիրական ընկերությունից, սակայն հեռախոսազանգերն անպատասխան էին մնացել։ Factor.am-ը նաև գրավոր հարցում էր ուղարկել ընկերությանը՝ հասկանալու, թե ինչու համայնքում խմելու ջուր չկա, և երբ կկարգավորվի այդ խնդիրը։ «Վեոլիա Ջուր» ընկերության հանրային կապերի բաժնի պետ Մուրադ Սարգսյանը սահմանված ժամկետներում պատասխանել է մեր հարցմանը և համայնքում խմելու ջուր չունենալը բացատրել այն հանգամանքով, որ բնակիչներն այն օգտագործում են ոռոգման նպատակով։ Հարցման պատասխանում, մասնավորապես, նշվում է․

«Ի պատասխան ձեր գրության՝ տեղեկացնում ենք, որ Սյունիքի Տեղ գյուղի որոշ տարածքներում առաջացած վիճակը հետևանք է նույն գյուղի բնակիչների կողմից խմելու ջուրը ոռոգման նպատակով օգտագործելու: Այդ մասին է վկայում թեկուզ այն, որ առաջին իսկ, քիչ թե շատ, հորդառառ անձևից հետո բողոքները ջրամատակարարումից դադարում են:
Իհարկե, մենք պայքարում ենք ջրի ապօրինի օգտագործման դեմ, սակայն ուղղակի ֆիզիկապես ի վիճակի չենք արդյունավետ վերահսկել ջրի նպատակային օգտագործումը. ոռոգման համակարգի բացակայության պարագայում տվյալ երևույթը կրում է զանգվածային բնույթ:

Ընդ որում խնդիրը նոր չէ, և այն սրանում է, ինչպես դուք իրավացիորեն նշում եք, ամռանը: Տարբերությունն այն է, որ այս տարի աննախադեպ շոգ եղանակներով պայմանավորված նույնքան աննախադեպ կերպով ավելացել է ոռոգմանն ուղղվող խմելու ջրի քանակը: Մենք իհարկե անում ենք ամեն ինչ գյուղին տրվող ջրաքանակի ավելացման համար, սակայն մեր հնարավորություններն էլ սահմանափակ են:

Կարծում ենք, ստեղծված իրավիճակում իր խոսքը պետք է ասի նաև գյուղի հանրությունն ու համայնքապետարանը, առանց որի խնդրահարույց է ջրամատակարարման շուտափույթ կարգավորումը Տեղ գյուղում»։

Նշենք՝ Տեղի համայնքապետ Ներսես Շադունցը մեզ հետ զրույցում ընդգծել էր, որ խնդիրը կարգավորելու համար նախևառաջ պետք է լուծել ոռոգման ջրի խնդիրը, ըստ այդմ՝ խմելու ջուրը կօգտագործվի իր նշանակությամբ։ Ըստ նրա՝ խնդիրը կարգավորելու համար նախագիծ է ներկայացրել Կառավարությանը և, եթե այդ նախագիծն իրականանա՝ Տեղ համայնքում մոտավորապես 65-70%-ով կլուծվի ջրի հարցը։

Արփի Հակոբյան