15.01.2025 | 14:11
36-ամյա տղամարդը դանակով հարվածել է հարևանին
Ադրբեջանցիները չեն պատրաստվում հեռանալ ՀՀ սուվերեն տարածքից. ինչ քայլերի կարող է դիմել Հայաստանը․ ՏԵՍԱՆՅՈւԹ
Քաղաքականություն
23.07.2021 | 21:33
Ադրբեջանի նախագահը հերթական անգամ տարածքային նկրտումներ է ներկայացնում։ Ադրբեջանական հեռուստաալիքներից մեկին տված հարցազրույցում Ալիևը հայտարարել է, որ շարունակում են իրենց դիրքերն ամրացնել Հայաստանի հետ սահմանին։ Նա խոսել է ՀՀ սուվերեն տարածք ադրբեջանական ԶՈւ ներխուժման մասին՝ նշելով, որ չեն պատրաստվում հեռանալ ու կրկին տարածքային պահանջներ է ներկայացրել։
«Շառլ Միշելը Երևան այցի ժամանակ սահմանային տարածքներն անվանեց վիճելի։ Ես համաձայն չեմ այդ արտահայտության հետ, քանի որ մենք այդ տարածքները համարում ենք մերը։ Ես գտնում եմ, որ դա Զանգեզուրի տարածքն է։ Իսկ Զանգեզուրը մեր նախնիների հողն է, և մենք գտնվում ենք մեր հողում։ Ես նրան փորձեցի բացատրել, որ մենք տեղաշարժվել ենք դեպի մեր սահմանները։ Ինչո՞ւ ենք մայիսին եկել, որովհետև ձյունը հալվել է։ Այն բանից հետո, երբ ձյունը հալվեց, մենք վերցրինք անհրաժեշտ բարձունքները ու տեղակայվեցինք դրանց վրա, ամրացանք այնտեղ ու կամրանանք»,-ասել է նա։
Մայիսի 12-ից թշնամու զինված ստորաբաժանումները Հայաստանի՝ միջազգայնորեն ճանաչված տարածքում են՝ Սև լճի հատվածում։ Այս առնչությամբ ՀԱՊԿ-ից մեր երկիրը մինչև օրս չի ստացել որևէ օգնություն, բացի հայտարարությունը, որ հետևում են իրավիճակին։ Ավելի ուշ, ՀԱՊԿ քարտուղարը հայտարարեց, որ տեղի ունեցածը սովորական սահմանային միջադեպ է՝ վերջնականապես ցույց տալով, որ կազմակերպությունը մտադիր չէ միջամտել։ Հայաստանցի փորձագետներից շատերը կարծում են, որ կառույցն իրեն չի արդարացնում։
«Պետք է քայլեր ձեռնարկվեն, և դրանցից մեկը ՀԱՊԿ-ից դուրս գալու գործընթաց սկսելն է։ Շատերը կարծում են, թե դրանով թշնամանում ենք ՌԴ-ի հետ։ Ոչ ոք չի ասում՝ բազայի պայմանագիրն 1-ին փուլով դենոնսացնել, թող դա մնա, փոխօգնության պայմանագրով ավելի լուրջ պարտավորություններ կան, քան ՀԱՊԿ-ով։ Ասում են՝ դուրս գանք, ավելի թանկ զենք կգնենք, էժան զենքը տեսանք՝ ինչ արդյունքի բերեց, ում էր պետք այդ զենքը»,-այսօր հրավիրված ասուլիսում ասաց «Ազատ քաղաքացի» ՀԿ նախագահ Հովսեփ Խուրշուդյանը։
«Պետք չի կառչել ՀԱՊԿ-ից, իրենց հետ կործանվե՞նք։ Մենք 5000, թե 4000 տարվա ժողովուրդ ենք, ՀԱՊԿ-ը 20 տարվա կազմակերպություն է, հիմա ՀԱՊԿ-ի պատճառով կործանվի՞ այս ազգը։ Զարմացած եմ՝ որքան կոնսերվատիվ քաղաքական դաշտ ունենք․ արագ է փոխվում ամեն ինչ»,-նույն ասուլիսում նշեց Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը։
Արդյոք Ադրբեջանը փորձում է նոր փաստաթղթի ստորագրման հասնել, մասնավորապես, այսպես կոչված խաղաղության պայմանագրի, ինչի մասին վերջին շրջանում խոսում են տարբեր շրջանակներ։ Ռազմական փորձագետ Դավիթ Հարությունովի գնահատմամբ՝ փաստացի այդ գործընթացի մեջ ենք։
Մանրամասները՝ տեսանյութում։
Մերի Մարտիրոսյան
