Ռուսական ներկայացուցչական պատվիրակություն է ժամանել Բաքու

Այսօր Բաքվում մեկնարկել է «Ռուսական  ընկերությունների գործնական առաքելությունը  Բաքվում» միջոցառումը, որն իրականացվում է «Ռոսէքսիմբանկի» հովանու ներքո։ Բաքու է ժամանել ռուսական ներկայացուցչական պատվիրակություն, քննարկվում են տրանսպորտի, լոգիստիկայի, արդյունաբերության, էներգետիկայի ու ֆինանսների ոլորտում համագործակցության հարցեր։

Ադրբեջանական լրատվամիջոցների հաղորդմամբ՝ Ադրբեջանն ու ՌԴ-ն պայմանավորվել են շարունակել աշխատանքները առևտրի ոլորտում խոչընդոտները վերացնելու, համատեղ ձեռնարկություններ ստեղծելու ու միջտարածաշրջանային երկխոսությունը զարգացնելու ուղղությամբ։ Ռուս-ադրբեջանական ռազմավարական գործընկերության  ամրապնդման ու հետագա զարգացման հարցերը քննարկել են Ադրբեջանի փոխվարչապետ  Շահին Մուստաֆաևն ու ՌԴ տնտեսական զարգացման փոխնախարար Դմիտրի Վոլվաչը։

Մասնավորապես, ռուս փոխնախարարն ասել է, որ  չնայած համավարակի բացասական հետևանքներին՝ Ռուսաստանի ու Ադրբեջանի իշխանությունները փոխադարձաբար աջակցություն կցուցաբերեն երկու երկրների գործարար շրջանակներին։

«Ֆինանսական և այլ ծառայությունների մատուցման ռուսական արտահանման կենտրոնի համալիր գործիքների օգտագործման շատ հնարավորություններ կան, ինչը լրացուցիչ լավատեսություն է հաղորդում երկկողմ արտաքին տնտեսական ծրագրերի իրականացմանը»,- ասել է Վոլվաչը։

Իր հերթին էլ Ադրբեջանի էկոնոմիկայի նախարար Միխայիլ Ջաբարովը հայտարարել է, որ Ադրբեջանը միտված է 2021թ-ին ավելացնել ՌԴ-ի հետ ապրանքաշրջանառությունը։ Նրա խոսքով՝ անցյալ տարի կրճատվել է շրջանառությունը, սակայն հիմա Ադրբեջանի ու Ռուսաստանի տնտեսություններն աճում են ու դա կազդի տնտեսական համագործակցության վրա։

Միջոցառման շրջանակում ռուսական «ԿԱՄԱԶ» ու «Գյանջայի՝ Գանձակի ավտոմոբիլային գործարանը» նաև հուշագիր են ստորագրել  համատեղ արտադրության կազմակերպման վերաբերյալ։

Բացի այդ,  «Ալյանս Լոգիստիկ» ընկերությունն էլ  ռուսական «RM Rail» ընկերությունից  100 վագոն է գնել, որի մասին հայտարարել է ռուս-ադրբեջանական գործնական խորհրդի նախագահ Սամեդ Գուրբանովը միջոցառման ժամանակ իր ելույթում։ Նա նաև ասել է, որ ադրբեջանական ընկերությունն արդեն կանխավճար է կատարել։

Իր հերթին էլ ռուսական «RM Rail» ընկերության ներկայացուցիչ Ալեքսեյ Սավելևն էլ ասել է, որ պատրաստ են երկաթուղային վագոնների մատակարարումները մեծացնել։

Ադրբեջանական կողմը չէր կարող առիթը բաց թողնել ու չխոսել իրենց իսկ կողմից շրջանառության մեջ դրված «Զանգեզուրի միջանցքի» մասին,  որի ստեղծումը որևէ փաստաթղթում ամրագրված չէ։

Մասնավորապես, Ադրբեջանի կապի ու բարձր տեխնոլոգիաների նախարար Ռաշադ Բաբիևը հայտարարել է, որ երկու երկրները սերտ համագործակցում են միջազգային տրանսպորտային միջանցքների կազմակերպման  ու կանոնավոր երթուղիների ընդկայնման գործում։  Ադրբեջանցի նախարարը հույս է հայտնել, որ  տրանսպորտային ուղիների ապաշրջափակումն ու «Զանգեզուրի միջանցքի» բացումը  կծառայեն ոչ միայն Ռուսաստանի և Ադրբեջանի տրանսպորտային ներուժին, այլև ամբողջ տարածաշրջանին:

Հիշեցնենք, որ հուլիսի 20-ին Մոսկվայում կայացած ՌԴ ու Ադրբեջանի ղեկավարների հանդիպմանը, Ռուսաստանի նախագահ  Վլադիրմիր Պուտինը հայտարարել էր, որ ռուսական ներկայացուցչական  պատվիրակություն  է մեկնելու Բաքու՝ տեղում տնտեսական համագործակցության հարցերը քննարկելու համար։

Էմմա Չոբանյան